16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Բաքուն Լեհաստանի նախագահի այցը ՀՀ-Ադրբեջան սահման «հակաադրբեջանական» է անվանել և խոստացել պատասխանել «սադրիչ քայլին»
Քաղաքականություն
27.11.2024 | 18:00
Ադրբեջանի արտաքին գործերի նախարարությունը մեկնաբանել է Հայաստանում գտնվող Լեհաստանի նախագահ Անջեյ Դուդայի այցը Ադրբեջանի հետ սահման և Եվրամիության քաղաքացիական դիտորդական առաքելության հետ պարեկություն իրականացնելը։
«Հայաստանում ԵՄ առաքելության անդամների ընկերակցությամբ Լեհաստանի նախագահ Անջեյ Դուդայի այցը Հայաստան-Ադրբեջան սահմանային գոտի, ցավոք, ԵՄ անդամ տարբեր երկրների ու եվրոպական կառույցների հակաադրբեջանական քաղաքականության հերթական ցուցադրությունն է»,- ասվում է Ադրբեջանի ԱԳՆ-ի՝ X-ում արված հրապարակման մեջ։
Բաքուն խորապես ափսոսում է, որ պաշտոնապես «Ադրբեջանի «ռազմավարական գործընկեր» հանդիսացող երկրի նախագահը մասնակցել է անընդունելի դիվանագիտական «հեռադիտակի շոուին», որը տանում է Ադրբեջանի և Լեհաստանի միջև հարաբերությունների սրման։
«Չնայած ադրբեջանցի պաշտոնյաների կողմից Լեհաստանի նախագահի աշխատակազմին և արտաքին գործերի նախարարությանը հղված բազմաթիվ հաղորդագրություններին՝ լեհական կողմը զերծ չի մնացել այս սադրիչ քայլից։ Ադրբեջանը պահպանում է այս ոչ բարեկամական գործողության դեմ պատշաճ դիվանագիտական միջոցներ ձեռնարկելու իր իրավունքը»,- ասվում է հայտարարության մեջ։
Թարգմանությունը՝ Էմմա Չոբանյանի
