30.04.2026 | 22:58
«Նուբարաշեն-Արին-Բերդ» ջրատարի վթարման հետևանքով Երևանի և Արարատի մարզի մի շարք հասցեներում 21 ժամ ջուր չի լինի
Ադրբեջանում իշխանություններին քննադատելու համար քաղաքագետին արգելել են լքել երկիրը
Քաղաքականություն
22.11.2024 | 23:38
Ադրբեջանցի հայտնի քաղաքագետ, Քաղաքական կառավարման ինստիտուտի տնօրեն Ազեր Գասիմլիին այսօր առավոտյան թույլ չեն տվել լքել երկիրը։ Բաքվի օդանավակայանի սահմանային հսկողության կետում նրան հայտնել են, որ ՆԳՆ-ն արգելք է դրել երկրից դուրս գալու համար։
«Այսօր առավոտյան ես ուղևորություն ունեի դեպի Պրահա, այնտեղից՝ Բեռլին։ Անձնագրային հսկողության ժամանակ ասացին, որ ՆԳՆ-ն արգելել է իմ ելքը երկրից։ Չգիտեմ ֆորմալ պատճառը։ Սակայն կարծում եմ, որ այս արգելքը քաղաքական որոշում է և ճնշում է ինձ վրա՝ կառավարության քաղաքականությունը քննադատելու համար։ Այս արգելքը անօրինական է։ Այդ հարցի շուրջ զրուցել եմ ՆԳՆ մամուլի ծառայության ղեկավար Էլշադ Հաջիևի հետ։ Էլշադ Հաջիևն ասել է, որ կուսումնասիրի պատճառը։ Այս պահին գնում եմ Բաքվի քաղաքային ոստիկանության բաժին»,- գրել է Գասիմլին ֆեյսբուքյան իր էջում։
ՆԳՆ մամուլի ծառայությունից ադրբեջանական լրատվամիջոցներին հաստատել է Գասիմլիի դիմումի մասին տեղեկությունը և նշել, որ «հարցը քննվում է»։
Գասիմլին չի բացառել, որ Բաքվում COP29-ի ավարտից հետո իրեն կարող են ձերբակալել շինծու մեղադրանքներով։
Նա հայտնի է իր ակտիվ քաղաքացիական դիրքորոշմամբ և ԶԼՄ-ներում և սոցիալական ցանցերում Ադրբեջանի կառավարության քաղաքականության քննադատությամբ, եղել է «Հանրապետական այլընտրանք» կուսակցության անդամ։ 2016 թվականին ևս Գասիմլիին արգելել էին լքել երկիրը։ Սակայն 2018 թվականի դեկտեմբերին Մարդու իրավունքների եվրոպական դատարանը անօրինական էր ճանաչել Ադրբեջանի 11 քաղաքացիների, այդ թվում՝ Գասիմլիի արտասահմանյան ճանապարհորդությունների արգելքը։
Վերջին մեկ տարում Ադրբեջանում բազմաթիվ ակտիվիստների, լրագրողների և քաղաքացիական հասարակության ներկայացուցիչների արգելվել է լքել երկիրը։
Էմմա Չոբանյան
