23.11.2024 | 15:05
Դոնալդ Թրամփը հայտարարել է ԱՄՆ-ի ֆինանսների նախարարի պաշտոնի հավանական թեկնածուին
Հրազդանի կիրճում քանդել են 300 հազար տարեկան բնական հուշարձան․ ահազանգ. ՏԵՍԱՆՅՈՒԹ
Հասարակություն
07.11.2024 | 22:25
Հրազդանի կիրճում շինարարական աշխատանքների հետևանքով վնասվել են տարածքում առկա սյունաձև բազալտները։ Այս մասին Ֆեյսբուք սոցիալական ցանցի իր էջում ահազանգել էր Հայոց ցեղասպանության թանգարան-ինստիտուտի նախկին տնօրեն, պատմական գիտությունների դոկտոր Հայկ Դեմոյանը։ Ըստ նրա՝ կիրճում էքսկավատորով ոչնչացվել է 300 հազար տարի առաջ ձևավորված բնական հուշարձան։
«Այս պարագայում խոսքը և՛ բնական, և՛ մարդու կողմից ստեղծված մշակութային ժառանգության մասին է։ Բնական հուշարձանի բազալտե սյուները երկրաբանական հետաքրքիր գոյացություններ են։ Բնական այդ հուշարձանը Երևանի այցեքարտն է։ Կա՞, արդյոք, թույլտվություն, որ այդտեղ շինարարություն են անում։ ԿԳՄՍ նախարարությունը պետք է հանրային ձևաչափով բացատրություն և հաշվետվություն տա»,- Factor TV-ի հետ զրույցում նշեց Հայկ Դեմոյանը։
Իսկ ո՞վ է շինարարություն իրականացրել կիրճի տարածքում։ Երևանի քաղաքապետարանից տեղեկացրին, որ Փարաջանովի 8 հասցեում գտնվող հողամասը սեփականության իրավունքով պատկանում է ԿԱՄԵՐՏՈՒՆ ՓԲԸ-ին։ Երևանի քաղաքապետարանի կողմից 2024 թվականի հոկտեմբերի 14-ին նշված ընկերությանը տրամադրվել է բազմաֆունկցիոնալ հասարակական նշանակության շենքի կառուցման շինարարության թույլտվություն՝ հիմք ընդունելով ՀՀ կառավարության 2022 թվականի մայիսի 13-ի հ․ 659-Ա որոշմամբ հաստատված ներդրումային ծրագիրը։
Երևանի քաղաղաքապետարանից մեզ հայտնեցին, որ սյունաձև բազալտների վնասման դեպքի առնչությամբ իրենց կողմից գրություններ են ուղղվել Շրջակա միջավայրի նախարարություն ու Բնապահպանության և ընդերքի տեսչական մարմին։ Պետք է նախ պարզեն՝ վնասված բազալտե սյուները ՀՀ բնության հուշարձանների ցանկում ընդգրկված «Անանուն» սյունաձև բազալտներ բնության հուշարձանի տարածքո՞ւմ են, թե՞ ոչ։
Հուշարձանը գտնվում է Հրազդանի կիրճի ձախափնյա մասում, Սբ. Սարգիս եկեղեցու մոտ։
Մանրամասները՝ տեսանյութում։
Աննա Բաբաջանյան
