05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Բաքուն կրկին ԵՄ դիտորդների՝ Ադրբեջանի հետ սահմանային գյուղ այց է արձանագրել և դժգոհել այդ հանգամանքից
Քաղաքականություն
29.10.2024 | 20:51
Հայաստանում տեղակայված ԵՄ դիտորդների հերթական խումբն այսօր այցելել է Ադրբեջանի հետ սահմանին գտնվող ՀՀ Ներքին Հանդ գյուղ։ Սա արձանագրել են ադրբեջանական լրատվամիջոցները՝ հավելելով, որ հոկտեմբերի սկզբից ավելի հաճախակի են դարձել Եվրամիության դիտորդների այցերը Ադրբեջանի հետ սահմանային գյուղեր և դժգոհելով այդ հանգամանքից։
Ադրբեջանական լրատվամիջոցները կադրեր են հրապարակում՝ նշելով, թե դիտորդները, որոնք սովորաբար երթևեկում են Եվրամիության մեքենաներով, այսօր սահման հասած երեք մեքենաներից մեկը ֆրանսիական դրոշով է եղել։
Նշվում է, որ գյուղ ժամանած մեքենաներում քաղաքացիական հագուստով 6 անձ է եղել։
Ադրբեջանական լրատվամիջոցները ենթադրություն են հայտնել, թե նրանք, իբր, «ֆրանսիական հետախուզական գերատեսչությունների աշխատակիցներ են եղել»։
«Թվում է, թե Ֆրանսիան արդեն սկսել է բացահայտորեն իր դրոշի ներքո տեղակայել իր հետախուզական ծառայությունների անդամներին ադրբեջանական սահմանին՝ առանց թաքնվելու ԵՄ դրոշի հետևում։ Սա Ֆրանսիայի հերթական քայլն է, որն աջակցում է Հայաստանում ռևանշիստական ուժերին և հրահրում է նոր պատերազմ՝ խաթարելու խաղաղության գործընթացը տարածաշրջանում»,- գրում են լրատվամիջոցները։
Մինչ այդ, Հայաստանում Ֆրանսիայի դեսպանությունը հայտնել է դեսպան Օլիվիե Դըկոտինյիի՝ Ներքին Հանդ կատարած այցի մասին։
«Հայաստանի Սյունիքի մարզի Ներքին Հանդ գյուղը երեք կողմից շրջապատված է ադրբեջանական մարտական դիրքերի կողմից, որոնք գտնվում են Հայաստանի տարածքի մի մասի վրա։ Սյունիքի մարզպետ Ռոբերտ Ղուկասյանն ու դեսպան Օլիվիե Դըկոտինյին մտքեր են փոխանակել այս իրավիճակում գտնվող բնակիչների հետ»,- հայտնել են դեսպանությունից։
Թարգմանությունը՝ Էմմա Չոբանյանի
