Պատերազմը միջազգայնացվում է․ Զելենսկին հեռախոսազրույց է ունեցել Հարավային Կորեայի նախագահի հետ

Ուկրաինայի նախագահ Վլադիմիր Զելենսկին հեռախոսազրույց է ունեցել Հարավային Կորեայի նախագահ Յուն Սեոկ Յոլի հետ։ Կողմերը քննարկել են Ուկրաինայի զինված ուժերի դեմ ռազմական գործողություններին հյուսիսկորեացի զինվորականների հնարավոր մասնակցության հարցը, գրում է BBC-ի ռուսական ծառայությունը։

«Քննարկել ենք հյուսիսկորեացի զինվորականների մասնակցությունն Ուկրաինա ռուսական ներխուժմանը։ Եզրակացությունը մեկն է՝ այս պատերազմը միջազգայնացվում է և դուրս է գալիս երկու երկրների սահմաններից»,- գրել է Զելենսկին Տելեգրամի իր ալիքում։

Նա ասել է, որ Հարավային Կորեայի նախագահին «թարմ տվյալներ է տրամադրել մարտական ​​գոտու անմիջական մերձակայքում 3 հազար հյուսիսկորեացի զինվորականների ռուսական զորավարժարանների մասնակցության և նրանց թիվը շուրջ 12 հազարի հասցնելու կանխատեսման մասին»։

«Պայմանավորվել ենք ուժեղացնել հետախուզական և փորձաքննության տվյալների փոխանակումը»,- նշել է Զելենսկին։

Ռուսաստանը և ԿԺԴՀ-ն ավելի վաղ հայտարարել էին, որ ռազմական համագործակցությունն իրականացվում է «համապարփակ ռազմավարական գործընկերության» համաձայնագրի շրջանակում, որը ստորագրվել է ամռանը Փհենյանում և վավերացվել Պետդումայի կողմից աշնանը։

ՌԴ նախագահ Վլադիմիր Պուտինն անցյալ շաբաթ չէր հերքել Հյուսիսային Կորեայից ռազմական անձնակազմի տեղափոխումը՝ ասելով․ «Ինչ և ինչպես մենք կանենք այդ հոդվածի շրջանակում (ռազմավարական գործընկերության համաձայնագրի մասին), մեր գործն է»։

Սեուլն էլ հայտնում է, որ Հարավային Կորեայի և Ուկրաինայի նախագահները պայմանավորվել են ռազմավարական խորհրդակցություններ անցկացնել՝ համատեղ արձագանքելու Մոսկվայի և Փհենյանի միջև անօրինական ռազմական համագործակցությանը, այդ թվում՝ հյուսիսկորեական զորքերի տեղակայմանը։

Թարգմանությունը՝ Էմմա Չոբանյանի