Օրվա ընթացքում Գյումրիի քաղաքապետը և «Բալասանյան» դաշինքի բոլոր անդամները հրաժարական կտան․ Լևոն Բարսեղյան

Գյումրիի ավագանու «Բալասանյան» դաշինքի բոլոր անդամներն օրվա ընթացքում հրաժարական կտան, այս մասին Factor.am-ի հետ զրույցում հայտնեց Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը։

««Բալասանյան» դաշինքի բոլոր 14 անդամները քաղաքապետի գլխավորությամբ հրաժարվում են մանդատներից, իսկ դաշինքի ցուցակի մյուս 6 անդամները, որոնք թեկնածուի կարգավիճակ ունեն, նրանցից 5-ը դիմում են գրել՝ դադարեցնելով իրենց թեկնածուի կարգավիճակը։ Նրանց մեկն արտերկրում է, որը ևս կգա և հրաժարական կներկայացնի»,- փոխանցեց նա։

Լևոն Բարսեղյանի խոսքով՝ դեռ նախորդ շաբաթ «Բալասանյան» դաշինքի անդամների հրաժարականի մասին լուրեր էին շրջանառվում, բայց դիմումներ չեն ներկայացրել, քանի որ քաղաքապետի առաջին տեղակալ Լուսինե Սոնոսյանը ԱՄՆ-ում է եղել, հիմա նա եկել է և որոշում են կայացրել։

Գյումրիի քաղաքապետի հրաժարականի լուրերի մասին Factor.am-ին դեռ չի հաջողվել մեկնաբանություն ստանալ քաղաքապետի մամուլի խոսնակից։ Նա հեռախոսազանգերին չի պատասխանում։ Ավելի վաղ Գյումրիի քաղաքապետ Վարդգես Սամոսնյանի մամուլի խոսնակ Սոնա Առաքելյանը Factor.am-ի հետ զրույցում չէր մեկնաբանել քաղաքապետի հրաժարակաի մասին լուրերը։

Խոսելով Գյումրիում առաջիկայում սպասվող զարգացումներից՝ Լևոն Բարսեղյանն ընդգծեց՝ եթե հոկտեմբեր-նոյեմբեր-դեկտեմբեր ամիսներին ավագանին նիստ չգումարի, այն կլուծարվի և արտահերթ ընտրություններ կլինեն:

Հիշեցնենք, որ հոկտեմբերի 24-ի ԱԺ-Կառավարություն հարցուպատասխանի ժամանակ անդրադարձ էր եղել Գյումրիի քաղաքային իշխանության կողմից մանդատները վայր դնելու թեմային։ Ի պատասխան ընդդիմադիր պատգամավորի հարցին՝ վարչապետ Նիկոլ Փաշինյանն ասել էր «Կներեք, ի՞նչ է պատահել Գյումրիում, որ էդքան տեղեկացված եք, մեզ էլ ասեք՝ ինչ է կատարվելու Գյումրիում, մենք էլ իմանանք»:

Մանյա Պողոսյան