18.12.2025 | 13:18
Ռուսաստանը և ԱՄՆ-ն այս հանգստյան օրերին բանակցություններ կանցկացնեն Մայամիում. Politico
Ուկրաինայի ԱԳ նախարարը Հաքան Ֆիդանին է ներկայացրել «հաղթանակի ծրագիրը»
Քաղաքականություն
21.10.2024 | 23:30
Ուկրաինայի արտգործնախարար Անդրեյ Սիբիհան Անկարայում Թուրքիայի ԱԳ նախարար Հաքան Ֆիդանի հետ հանդիպմանը քննարկել է «հաղթանակի ծրագիրը», «խաղաղության բանաձևը» և ուկրաինացի ռազմագերիների ազատ արձակումը։ Այս մասին նա հայտարարել է Ֆիդանի հետ մամուլի ասուլիսում, գրում Европейская правда-ն։
Սիբիհան ընդգծել է, որ Թուրքիան Ուկրաինայի ռազմավարական գործընկերն է, որի հետ ձգտում է զարգացնել բարեկամական հարաբերություններ։ Նրա խոսքով՝ թուրք գործընկերոջ հետ բանակցությունների ընթացքում նշել է խաղաղության նախաձեռնությունների միջև մրցակցությունից խուսափելու կարևորությունը։
«Ես համոզված եմ, որ Թուրքիան կարող է կարևոր դեր խաղալ այս հարցում»,- ասել է ուկրաինացի նախարարը։
Նա հավելել է, որ Ֆիդանին տեղեկացրել է Ուկրաինայի նախագահ Վլադիմիր Զելենսկիի «հաղթանակի ծրագրի» մասին։
«Կարևոր է հասկանալ, որ սա «խաղաղության բանաձևի» փոխարինում չէ, այլ դրա իրականացման գործնական գործիք»,- ընդգծել է Սիբիհան։
Հանդիպմանը քննարկվել են նաև Սև ծովում նավագնացության ազատության ապահովման, պաշտպանության ոլորտում համագործակցության, Ուկրաինայի վերականգնման և ռազմագերիների ազատ արձակմանն ուղղված ջանքերը։
«Մենք նաև քննարկել ենք թուրքական կողմի աջակցությունը ռուսական գերությունից ռազմագերիների, այդ թվում՝ Ղրիմի թաթարների ազատ արձակմանը»,- ասել է Ուկրաինայի ԱԳ նախարարը։
Նա հանդիպումներ է անցկացնելու նաև Թուրքիայի պաշտպանության նախարար Յաշար Գյուլերի և առևտրի նախարար Օմեր Բոլաթի հետ։ Ստամբուլում Սիբիհան մասնակցելու է նաև SAHA EXPO-2024 պաշտպանական-արդյունաբերական ցուցահանդեսին, որտեղ առանձին հանդիպումներ է ունենալու թուրքական պաշտպանական ընկերությունների հետ։
Թարգմանությունը՝ Էմմա Չոբանյանի
