Թուրքիայի ԱԳ նախարարը հայտարարել է, որ Իրանի և Իսրայելի միջև պատերազմի հավանակությունը մեծ է․ պետք է պատրաստ լինել դրան

Թուրքիայի ԱԳ նախարար Հաքան Ֆիդանն Իրանի ու Իսրայելի միջև ռազմական հակամարտության հավանականությունը «բարձր» է անվանել։ Այս մասին նա ասել է Haber Global հեռուստաալիքին տված հարցազրույցում։

«Մենք պետք է պատրաստ լինենք դրան՝ որպես երկիր և տարածաշրջան»,- ասել է Ֆիդանը՝ հավելելով, որ Անկարան չի ցանկանում, որ պատերազմն ընդլայնվի ամբողջ տարածաշրջանում և անխոնջ աշխատում է հակամարտություններին վերջ դնելու համար, որոնք ավերել են Մերձավոր Արևելքը վերջին երկու տասնամյակների ընթացքում:

Ֆիդանը նաև ասել է, թե հարձակման դեպքում Իրանն ինքնապաշտպանվելու իրավունք ունի:

«Հետևաբար, մենք ոչ մի կերպ կողմնակից չենք Իրանի մասնակցությամբ որևէ հակամարտության կամ պատերազմի բռնկմանը։ Մյուս կողմից, սակայն, եթե Իրանը գործում է ինքնապաշտպանության նպատակով, իհարկե, դա նրա իրավունքն է»,- ասել է Թուրքիայի ԱԳ նախարարը։

Պատասխանելով հարցին՝ որքանո՞վ է պատրաստ Թուրքիան հնարավոր համաշխարհային պատերազմին, նախարարը նշել է, որ երկրի շատ կառավարական մարմիններ զբաղված են «այդ հարցի պատասխանը փնտրելով և նախապատրաստվելով»։ Նա նաև հայտարարել է, որ Անկարան կանխատեսել է, որ Իսրայելը կփորձի ոչնչացնել ՀԱՄԱՍ-ին, «Հըզբոլլահ»-ին և հութիներին, և որ նրա հարձակումները Լիբանանի վրա անակնկալ չեն եղել։ Ըստ Ֆիդանի՝ հոկտեմբերի 7-ից ի վեր ամենամեծ մտահոգությունը տարածաշրջանում նոր ճակատներ բացելու՝ Իսրայելի ներուժն է, և Թել Ավիվը ձգտում է հասնել այդ նպատակին:

«Հիմա մենք բախվում ենք փոխկապակցված իրադարձությունների։ Ցեղասպանություն է տեղի ունենում Գազայում, մինչդեռ կա նաև Լիբանան, կա նաև Իրանի հետ պատերազմի հավանականություն»,- ասել Ֆիդանը։

Նա նաև ընդգծել է՝ Թուրքիան «ոչ մի թիզ օտար հողի նկատմամբ հավակնություն չունի»։

Թարգմանությունը՝ Էմմա Չոբանյանի