08.10.2026 | 17:35
Եվրախորհրդարանում կոչ են արել փակել ԵՄ տարածքում գործող բոլոր «Ռուսական տները»
Մահացել է One Direction խմբի նախկին անդամ Լիամ Փեյնը
Քաղաքականություն
17.10.2024 | 13:02
Բրիտանական հայտնի One Direction խմբի նախկին անդամ, 31-ամյա Լիամ Փեյնը մահացել է՝ ընկնելով Բուենոս Այրեսի հյուրանոցներից մեկի պատշգամբից, հայտնել են տեղի պաշտոնյաները, գրում է France24-ը։
Բուենոս Այրեսի ոստիկանությունը հայտարարության մեջ նշում է, որ Փեյնն ընկել է Արգենտինայի մայրաքաղաքի Պալերմո թաղամասում գտնվող Casa Sur հյուրանոցի երրորդ հարկից, ինչի հետևանքով «ծայրահեղ ծանր վնասվածքներ է ստացել»: Բժիշկները տեղում հաստատել են նրա մահը։
Բուենոս Այրեսի մունիցիպալիտետի անվտանգության նախարարության խոսնակ Պաբլո Պոլիցիչիոն Associated Press-ին ասել է, որ Փեյնը «ցած է նետվել իր սենյակի պատշգամբից»: Նրա տեղեկացմամբ՝ ոստիկանություն է ուղարկվել հյուրանոց՝ ի պատասխան «ագրեսիվ տղամարդու մասին» ահազանգի, որը կարող էր լինել թմրանյութերի կամ ալկոհոլի ազդեցության տակ: Հյուրանոց ժամանած ոստիկանները հյուրանոցի բակում գտել են Փեյնի մարմինը։
Փեյնը բացահայտ խոսում էր ալկոհոլից կախվածության դեմ պայքարի մասին՝ 2023 թվականի հուլիսին YouTube-ի իր ալիքում տեղադրելով տեսանյութ, որտեղ ասում էր, որ բուժում անցնելուց հետո վեց ամիս է՝ սթափ է։
Լիամ Փեյնը ծնվել է Անգլիայի Վուլվերհեմփթոն քաղաքում 1993 թվականին։ Նա One Direction-ի անդամ էր 2010 թվականից։
Թարգմանությունը՝ Էմմա Չոբանյանի
