09.09.2026 | 18:00
«Հովանավորել են ծառահատումները»․ հայտնի է՝ ինչու է Հակակոռուպցիոնը մտել էկոպարեկային ծառայություն
Դատախազությունը գրավոր հարցում է ուզում, որ ասի` Վարդապետյանի ներկայությամբ Քյարամյանի արած հայտարարությունն ուսումնասիրո՞ւմ է, թե` ոչ
Քաղաքականություն
16.10.2024 | 15:29
Գլխավոր դատախազ Աննա Վարդապետյանին գրավոր հարցում է անհրաժեշտ` հասկանալու համար, թե երեկ ԱԺ-ում իր ներկայությամբ ՔԿ նախագահ Արգիշտի Քյարամյանի աղմկահարույց հայտարարությունն ուսումնասիրելու անհրաժեշտություն կա, թե` ոչ։
Հիշեցնենք` երեկ ԱԺ պաշտպանության և անվտանգության հարցերի հանձնաժողովի կողմից իրավապահ համակարգի ղեկավարների մասնակցությամբ խորհրդարանական լսումներ էր հրավիրված։ Արգիշտի Քյարամյանի և Հովիկ Աղազարյանի միջև թեժ վեճ տեղի ունեցավ` փողոցային բառապաշարով։ Վեճի ընթացքում Արգիշտի Քյարամյանն էլ ավելի աղմկահարույց հայտարարություն արեց, քան իր ու Աղազարյանի մասնակցությամբ վեճն էր։
«Պարոն Աղազարյան, խնդրում եմ նաև մեկնաբանեք, թե ինչով է պայմանավորված, որ առնվազն երկու անգամ ինձ դիմել են Ձեր տղայի հետ կապված քրեական գործով՝ մեքենաները հենց նույն այդպիսի վարույթներով վերադարձնելու վերաբերյալ։ Բա եթե մենք խոսում ենք կոռուպցիայի դեմ պայքարից, հովանավորչությունից, խնդրում եմ պատասխանեք այս հարցին»,-ասաց ՔԿ նախագահը։
Factor.am-ն այսօր գլխավոր դատախազությունից հետաքրքրվեց` արդյո՞ք Քյարամյանի հայտարարությունն ուսումնասիրվում է։ Իրավապահ կառույցից այս հարցին պատասխանելու համար գրավոր հարցում ուզեցին, ինչը ուղարկվել է։ Ըստ էության, Քյարամյանի հայտարարությունը հանցագործության մասին հաղորդում էր` քրեական վարույթին միջամտելու մասին։ Բազմաթիվ հարցեր են առաջանում` ովքեր են միջամտել և ինչ որոշումներ են կայացվել այդ միջամտություններից հետո։
Ինչո՞ւ է ՔԿ նախագահն այդ մասին լռել, արդյո՞ք միջամտության առնչությամբ գործընթացներ սկսվել են, եթե` ոչ, ապա ով է լինելու դրա պատասխանատուն։ Գլխավոր դատախազության պատասխանը կհրապարակենք ստանալուն պես։
Նարեկ Կիրակոսյան
