20.02.2026 | 15:21
Նեյմարը չի բացառել, որ կավարտի կարիերան այս տարի
«Ասաց, ոնց որ ավտոյից մի բան ընկավ»․ վթարված «Գազել»-ի դեպքով քրեական վարույթ կա. ՏԵՍԱՆՅՈՒԹ
Հասարակություն
11.10.2024 | 21:00
Իջևան-Դիլիջան-Երևան երթուղին սպասարկող «Գազել» մակնիշի ավտոմեքենայի ողբերգական ավտովթարից տուժած քաղաքացիներից մեկի եղբայրը պատմում է՝ վթարից տուժած 59-ամյա քույրն արդեն երկու օր է՝ «Միքայելյան» համալսարանական հիվանդանոցի վերակենդանացման բաժանմունքում է։ Հարազատները դռան մոտ սպասում են տեսակցության ժամին։
Տղամարդը, որը չցանկացավ տեսախցիկի առաջ խոսել, մեզ հետ զրույցում ասաց՝ քրոջը շատ հարցեր չեն տալիս վթարի հետ կապված, քանի որ վնասվածքների պատճառով դժվարանում է խոսել։ Եղբոր խոսքով՝ քույրն Իջևանից Աբովյան էր գնում, իսկ միջհամայնքային տրանսպորտից տարվա մեջ ընդամենը երկու-երեք անգամ է օգտվել, չեն պատկերացրել, որ այս անգամը նման հետևանքներ կունենա։
«Միքայելյան» համալսարանական հիվանդանոց տեղափոխված կինն ունի թոքերի երկկողմանի սալջարդ, կողերի բազմաթիվ կոտրվածքներ և այլ վնասվածքներ։ Բժշկի խոսքով՝ դեռևս պարզ չէ, թե որքան ժամանակ անհրաժեշտ կլինի վերականգնողական փուլը հաղթահարելու համար։
Վթարը տեղի է ունեցել Երևան-Սևան ավտոճանապարհի «Չայնիի ոլորաններ» անունով հայտնի հատվածում։ Իջևան-Դիլիջան-Երևան երթուղին սպասարկող «Գազել» մակնիշի միկրոավտոբուսը դուրս է եկել ավտոճանապարհի երթևեկելի գոտուց և ընկել ձորակը։ Հոկտեմբերի 9-ին տեղի ունեցած պատահարի հետևանքով 2 մարդ զոհվել է, իսկ «Գազել»-ի վարորդն ու 7 ուղևորները տարբեր վնասվածքներով բժշկական կենտրոններ են տեղափոխվել։
Առողջապահության նախարարությունից Factor TV-ին հայտնեցին, որ տուժածներից 3-ի վիճակը միջին ծանրության է, 3-ը վերակենդանացման բաժանմունքում են, որից 2-ի առողջական վիճակը ծայրահեղ ծանր է։ Ուղևորների թվում կա նաև անչափահաս, որի առողջական վիճակը գնահատվում է բավարար։ Դեպքի առթիվ քրեական վարույթ է նախաձեռնվել։ Այս մասին հաղորդագրություն է տարածել Քննչական կոմիտեի խոսնակ Գոռ Աբրահամյանը։
Ըստ ՔԿ խոսնակի՝ քննությամբ պետք է պարզվի՝ վթարը տեխնիկակա՞ն, թե՞ մարդկային գործոնով է պայմանավորված եղել։ Իսկ մինչ այդ, քրեական վարույթը նախաձեռնվել է տրանսպորտի անվտանգ աշխատանքն ապահովող պահանջները կամ կանոնները խախտելու հոդվածով։ Այն ենթադրում է 2-ից 5 տարի ժամկետով ազատազրկում՝ անզգուշությամբ մարդու մահ առաջացնելու հատկանիշով։
Մանրամասները՝ տեսանյութում։
Անի Թամրազյան
