WCIT 2024 միջոցառման շրջանակներում, հրավառության իրականացման պահի դրությամբ, հրավառություն իրականացնող անձը չի ունեցել Ներքին գործերի նախարարության կողմից տրամադրված թույլտվություն, այս մասին Factor.am-ին տեղեկացրել են ՆԳՆ-ից։
Իրավապահ մարմնից նաև նշել են, որ թույլտվության չտրամադրման պայմաններում հրավառություն իրականացնելը իրավաչափ չէ, ինչի շրջանակներում Ներքին գործերի նախարարության կողմից կձեռնարկվեն համարժեք միջոցներ։
Հիշեցնենք, որ Երևանի քաղաքապետ Տիգրան Ավինյանը քաղաքապետարանի գործակարգավարական նիստին հայտնել էր, որ ուրբաթ օրը Երևանի կենտրոնում WCIT-ի շրջանակում տեղի ունեցած համերգից հետո հրավառություն իրականացնելու թույլտվություն ստանալու համար քաղաքապետարան չեն դիմել: Նա հանձնարարեց արձանագրություն կազմել՝ խորհրդակցելով ՆԳՆ-ի հետ:
«Սա այն միջոցառումներից մեկն էր, որտեղ, վստահաբար, թույլատրելի կլիներ հրավառությունը, եթե լիներ դիմում»,- ընդգծել էր քաղաքապետը։
Հավելենք, որ պետական կամ համայնքային միջոցառումների շրջանակներում կենցաղային նշանակության հրագործական III դասի և տեխնիկական նշանակության հրագործական արտադրատեսակների կիրառման թույլտվություն տալիս է Ներքին գործերի նախարարությունը։
Մանյա Պողոսյան
