ՆԱՏՕ-ն Ռամշտեյնում կայանալիք հանդիպմանն Ուկրաինային կոնկրետ քայլեր կառաջարկի դաշինքին միանալու համար

ՆԱՏՕ-ի դաշնակիցները պատրաստվում են Ուկրաինային ավելի կոնկրետ քայլեր առաջարկել դաշինքին ապագա անդամակցության ուղղությամբ։ Այս մասին գրում է The Washington Post-ը՝ վկայակոչելով արևմտյան դիվանագետին։

Աղբյուրի խոսքով՝ դա տեղի կունենա Ուկրաինայի պաշտպանության հարցով կոնտակտային խմբի նիստին (Ռամշտեյնի ձևաչափ), որը տեղի կունենա հոկտեմբերի 12-ին Գերմանիայում։ Դրան ծրագրում է մասնակցել ԱՄՆ նախագահ Ջո Բայդենը։

Հանդիպման ընթացքում Ուկրաինայի նախագահ Վլադիմիր Զելենսկին ևս մեկ անգամ կներկայացնի իր «հաղթանակի ծրագիրը» Ռուսաստանի հետ պատերազմում։

ՆԱՏՕ-ն որոշել է մեղմել իր դիրքորոշումը դաշինքին Ուկրաինայի անդամակցելու հարցում ֆիասկոյի ֆոնին՝ ստանալու Ռուսաստանին արևմտյան հեռահար զենքով հարվածելու թույլտվությունը, նշել է աղբյուրը։ Այնուամենայնիվ, քայլերը, որոնք կառաջարկվեն Կիևին Գերմանիայում կայանալիք հանդիպման ժամանակ, նույնպես «չեն հասնում» ուկրաինական կողմի նախապես պահանջած «հրատապ միջոցներին», հավելել է նա։

Ուկրաինացի պաշտոնյաները կարծում են, որ ԱՄՆ-ի գալիք նախագահական ընտրությունները, անկախ արդյունքից, կասկածի տակ են դնում Ուկրաինային անվտանգությանն ապագա աջակցությունը:

Կիևը փորձել է համոզել Բայդենին աջակցել իր «հաղթանակի ծրագրին», որը կարող է դառնալ նրա քաղաքական ժառանգության կարևոր մասը: Սակայն Սպիտակ տունը հազիվ թե ձեռնարկի որևէ քայլ, որը կարող է ոչ ժողովրդական լինել՝ Քամալա Հարիսի քարոզարշավը վտանգելուց խուսափելու համար, ասում են պաշտոնյաները:

Թարգմանությունը՝ Տաթև Ֆռանգյանի