Ֆրանսիայում Ադրբեջանի իշխանությունների քննադատ էմիգրանտը հարձակման է ենթարկվել

Ֆրանսիայում բնակվող ադրբեջանցի քաղաքական էմիգրանտ Վիդադի Իսկենդարլին հարձակման է ենթարկվել։ Առաջինն այս մասին սոցցանցերում հայտնել է ադրբեջանցի լրագրող Գանիմաթ Զահիդը։

«Ֆրանսիայի Մյուլուզ քաղաքում բնակվող Վիդադի Իսկենդերլին հարձակման է ենթարկվել անհայտ անձանց կողմից։ Առավոտյան ժամը 7:30-ի սահմաններում հարձակվողները ներխուժել են տուն, որտեղ նա բնակվում է, և դանակի բազմաթիվ հարվածներ հասցրել։ Իսկենդերլին այժմ վերակենդանացման բաժանմունքում է, նրա վիճակը գնահատվում է ծանր»,- նշել է Զահիդը։

Ադրբեջանական մի  շարք աղբյուրներ հաստատում են հարձակման մասին լուրը։ Լրատվամիջոցներին Իսկենդերլիի հարազատները պատմել են, որ առավոտյան երեք դիմակավորված անձինք պատուհանից ներխուժել են նրա բնակարան։ Հարձակվողներից մեկը դանակի բազմաթիվ վնասվածքներ է հասցրել Իսկենդերլիին, իսկ մյուս երկուսը կանգնել են դռան մոտ։ Իսկենդերլին պաշտպանվել է, և հարվածների մեծ մասը դիպել է նրա ձեռքին։ Սակայն նա գլխին մի քանի հարված է ստացել։ Չնայած ստացած վնասվածքներին՝ Իսկենդերլիին հաջողվել է դուրս հրել հարձակվողին ու ոստիկանություն կանչել։

Այժմ ադրբեջանցի էմիգրանտը հիվանդանոցի վերակենդանացման բաժանմունքում է։ Հարձակվողները դիմակներով են եղել ու չեն խոսել, ուստի տուժողը չգիտի, թե ինչ ազգության են նրանք։

Հավելենք, որ արտասահմանում բնակվող Ադրբեջանի իշխանությունների քննադատների նկատմամբ հաճախ են հարձումներ տեղի ունենում։ Երկու տարի առաջ Իսկենդերլին կրկին հարձակման էր ենթարկվել։ Ոստիկանությունը պարզել է, որ դա տեղի հանցավոր խմբավորումների ձեռքի գործն է: Իսկենդերլին կարծում է, որ հրահանգը եկել է Ադրբեջանի իշխանություններից։

Նա հայտնի է սոցցանցերում Ադրբեջանի իշխանությունների հասցեին կոշտ քննադատությամբ։ Ադրբեջանում Իսկենդերլին զբաղվել է ընդդիմադիր գործունեությամբ, կալանավորվել է և դատապարտվել։ Շուրջ 10 տարի առաջ նա մեկնել է Ֆրանսիա և այժմ բնակվում է այնտեղ։

Թարգմանությունը՝ Էմմա Չոբանյանի