15.03.2026 | 17:48
«Ոսկե ծիրանը» ընդգրկվել է աշխարհում անցկացվող 50 փառատոնների շարքում․ Ժաննա Անդրեասյան
Նասրալլայի զարմիկը՝ «Հըզբոլլահ»-ի նոր գլխավոր քարտուղար
Քաղաքականություն
30.09.2024 | 12:28
Լիբանանյան «Հըզբոլլահ» շարժման նոր գլխավոր քարտուղար է ընտրվել Հաշեմ Սաֆի ադ-Դինը, հայտնում է Al Arabiya-ն՝ հղում անելով իր աղբյուրներին։ Միաժամանակ, լրատվականը նշում է, որ նրա ընտրվելու մասին պաշտոնական հայտարարություն դեռևս չկա։
Մինչ այժմ Սաֆի ադ-Դինը «Հըզբոլլահ»-ի գործադիր խորհրդի նախագահն էր։ Նա շարժման սպանված առաջնորդ Սեյեդ Հասան Նասրալլայի զարմիկն է։
Detaly.co.il-ը, սակայն, գրում է, թե «Հըզբոլլահ»-ը հերքել է տեղեկություններն այն մասին, որ կազմակերպության Շուրայի խորհուրդը փոխարինող է ընտրել գլխավոր քարտուղար Հասան Նասրալլային, որը սպանվել է Բեյրութի Դահիե թաղամասին իսրայելական հարվածի ժամանակ:
«Մենք հստակեցնում ենք, որ մեր կազմակերպչական ընթացակարգերի վերաբերյալ բոլոր լուրերը վավերականություն չունեն և չպետք է դրանց վրա հիմնվել։ Այս հարցում պետք է հիմնվել միայն պաշտոնական հայտարարությունների և փաստաթղթերի վրա»,- ասվում է Շուրայի խորհրդի պաշտոնական հայտարարության մեջ:
Սեպտեմբերի 28-ին հայտնի դարձավ, որ «Հըզբոլլահ»-ի երկարամյա առաջնորդ Հասան Նասրալլան սպանվել է Բեյրութի հարավում գտնվող կազմակերպության ստորգետնյա շտաբի վրա իսրայելական ավիահարվածի հետևանքով։ Կազմակերպությունը հաստատել է տեղեկությունը։ Նասրալլայի սպանության գործողության ընթացքում Իսրայելը մեկ տոննա կշռող 85 ռումբ է նետել Բեյրութի հարավային արվարձանների վրա։
Թարգմանությունը՝ Տաթև Ֆռանգյանի
