22.11.2024 | 12:44
Հունաստանում ՀՀ դեսպանը հանդես է եկել «Հայաստանի անվտանգային միջավայրն այսօր» թեմայով դասախոսությամբ
Թուրքիան չի շտապի․ Էրդողանը` ՆԱՏՕ-ին Ուկրաինայի անդամակցության մասին
Քաղաքականություն
25.09.2024 | 21:02
ՆԱՏՕ-ին անդամակցելու՝ Ուկրաինայի առաջարկը «շտապելու» հարց չէ: Այս մասին NBC News-ին տված բացառիկ հարցազրույցում հայտարարել է Թուրքիայի նախագահ Ռեջեփ Թայիփ Էրդողանը՝ հավելելով, որ Անկարայի և Մոսկվայի հարաբերություններն «ընդլայնվում են»:
Նա նշել է, որ ԱՄՆ-ն ու դաշինքի մյուս անդամները «չեն ցանկանում, որ Ուկրաինան լինի անդամ երկիր»։
«Սրանք շտապելու հարցեր չեն։ Որոշումներ կայացնելիս մենք միշտ հաշվի ենք առնում ՆԱՏՕ-ի անդամ մյուս երկրների դիրքորոշումը, քննարկում ենք այդ հնարավոր հարցերը սեղանի շուրջ և համապատասխանաբար կայացնում վերջնական որոշումներ։ Մենք պատրաստվում ենք հետևել զարգացումներին, քննարկումներին և, ըստ այդմ, վերջնական որոշում կայացնել։ Սրանք այնպիսի որոշումներ չեն, որոնք պետք է կայացնել շտապ»,- նշել է Էրդողանը։
Թուրքիայի նախագահը որոշ շրջանակների կողմից քննադատության է ենթարկվել հաջորդ ամիս Ռուսաստանում կայանալիք ԲՐԻԿՍ-ի համաժողովին մասնակցելու հրավերն ընդունելու համար՝ ցույց տալով իր բաց լինելը զարգացող երկրների բլոկի հանդեպ՝ Բրազիլիայի, Ռուսաստանի, Հնդկաստանի, Չինաստանի և Հարավային Աֆրիկայի գլխավորությամբ:
«Ռուսաստանի հետ մեր հարաբերությունները բազմաչափ են, դրանք քաղաքական, տնտեսական, մշակութային են՝ կապված պաշտպանական արդյունաբերության հետ։ Այնտեղ շատ չափումներ կան, և մեր համերաշխությունը, մեր փոխգործակցությունը շարունակվում է, տնտեսապես ամեն օր այդ հարաբերություններն ընդլայնվում են»,- ասել է Թուրքիայի նախագահը։
Ի տարբերություն Միացյալ Նահանգների և մի շարք այլ երկրների, որոնք ՀԱՄԱՍ-ը հռչակել են ահաբեկչական կազմակերպություն, Էրդողանն ասել է, որ դա չի արել, քանի որ զինյալ խմբավորումը «ջանք է գործադրում՝ պաշտպանելու իրենց հայրենիքը, և իրականում այն դիմադրության խումբ է, ուստի չի կարող խումբն անվանել ահաբեկչական կազմակերպություն»։
Չնայած ԱՄՆ-ի հասցեին իր քննադատությանը՝ Էրդողանը պնդել է, որ պատրաստ է աշխատել նրա հետ, ով կհաղթի ամերրիկյան ընտրություններում։
«Մենք կառավարում ենք երկրները, ազգերին, ժողովուրդներին, սակայն մենք չենք կարող առանձին մտածել։ Ամերիկյան դիրքորոշումը գլոբալ մասշտաբով լիովին ակնհայտ է, Ռուսաստանի դիրքորոշումը գլոբալ մասշտաբով լիովին ակնհայտ է։ Եվ մենք պատրաստվում ենք սերտորեն շարունակել մեր հարաբերությունները բոլոր վարչակազմերի հետ»,- հայտարարել է Թուրքիայի նախագահը։
Թարգմանությունը՝ Էմմա Չոբանյանի
