ԵՄ-ն կարող է ՀՀ-ից ռուսների հեռացման պայման դնել՝ վիզայի ազատականացման դիմաց, որ ՌԴ-ի համար խնդիրներ ստեղծի․ Հակոբ Բադալյան․ ՏԵՍԱՆՅՈՒԹ

Վարչապետ Փաշինյանն այսօր Համաշխարհային հայկական երկրորդ գագաթնաժողովի ժամանակ հայտարարեց, որ ՀԱՊԿ-ը ստեղծում է սպառնալիքներ Հայաստանի անվտանգության համար, Հայաստանի հետագա գոյության, ինքնիշխանության և պետականության համար, դրա համար է Երևանը սառեցրել է իր անդամակցությունն այդ կառույցում։
«Մենք լիարժեք կվերականգնենք մեր գործունեությունը ՀԱՊԿ-ում միայն այն պարագայում, երբ մեր բարձրացված հարցերին հնչեն կոնկրետ պատասխաններ: Մեր այդ շեշտադրումից անցել է երկու տարի, պատասխանները ոչ միայն չեն հնչել և արդեն ակնհայտ է, որ չեն հնչելու: Կամ, եթե նույնիսկ ակնհայտ չէ, բայց ես կարող եմ ասել, որ ինչքան այդ պատասխանները չեն հնչում և դրանք համոզիչ չեն, ամեն վայրկյան Հայաստանն ավելի ու ավելի է հեռանում ՀԱՊԿ-ից», – ընդգծեց Փաշինյանը։
Ի՞նչ վտանգ է ներկայացնում ՀԱՊԿ-ն՝ ըստ վարչապետի։ Քաղաքական մեկնաբան Հակոբ Բադալյանը Factor TV-ի հետ հարցազրույցում ասում է, որ հավանաբար՝ Փաշինյանի կարծիքով վտանգն այն է, որ ՀՀ-ն ՀԱՊԿ-ի կցորդ լինելով՝ ՌԴ-ի հետ հարաբերություններում ՀՀ-ն մանրադրամի է վերածվում։
«Խնդիրն այն է, որ ՀՀ-ն որևէ գործնական աջակցություն չի էլ ակնկալել ՀԱՊԿ-ից, և ՀԱՊԿ-ն էլ պատրաստակամ չէ՝ գործնականորեն ՀՀ-ի համար մարտահրավեր ներկայացնող հարցերում աջակցել՝ մի շարք օբյեկտիվ և սուբյեկտիվ պատճառներով։ Նիկոլ Փաշինյանը պարզապես փորձում է այս թեման խաղարկել քաղաքական հռետորաբանության, տեղեկատվա-քարոզչական շրջանակում, դրանից ակնկալելով դիվիդենտներ»։
Անդրադառնալով վարչապետի այն դիտարկմանը, որ ՀԱՊԿ-ի մասով ՀՀ-ն մոտենում է անդառնալիության կետին, Բադալյանը ասում է․
«Առաջին անգամ չէ, որ այս մասին Փաշինյանը հայտարարում է, այդ մասին մի քանի շաբաթ առաջ նաև ԱԺ-ում էր խոսել, որ այդպիսի մի կետի ենք հասել կամ հասնում։ Դե սա հռետորաբանություն է, և այդ կետը միշտ կարելի է մոտեցնել կամ հեռվացնել՝ ըստ քաղաքական նկատառումների կամ անհրաժեշտության։ Ուշադրություն դարձնենք այն փաստին, որ Փաշինյանը այս խոսույթը խաղարկում է ԲՐԻԿՍ-ի գագաթնաժողովին մասնակցելու որոշման և դրա շուրջ բևեռացված մտայնությունների ձևավորման ֆոնին։ Հայտնի ասուլիսում ՌԴ-ի վերաբերյալ նրա գնահատականները որոշակի հասարակական-քաղաքական շրջանակում բերեց եզրահանգումների, որ նա շեղվում է արևմտյան կուրսից և վերադառնում է ռուսական կուրս։ Հիմա Փաշինյանը փորձում է բալանսավորել իրավիճակը՝ դարձյալ իր քաղաքական հաշվարկներից ելնելով։ Նա գրառում էր արել բալանսավորման քաղաքականության համատեքստում, և կարծում եմ՝ այս հայտարարությունը դրա համատեքստում է։ Ես Փաշինյանի քաղաքականությունում չեմ տեսել շեղում ՌԴ-ից արևմուտք, դա եղել է իրավիճակից բխող որոշակի քայլեր՝ այս կամ այն արտաքին ուղղությամբ»,- ասաց քաղաքական մեկնաբանը։

Հարցազրույցն ամբողջությամբ՝ տեսանյութում։

Ռոբերտ Անանյան