Ադրբեջանի կողմից Արցախի գրավման մասին Նիդերլանդների կառավարության դիտարկումը Բաքվի դժգոհությունն է առաջացրել

Պաշտոնական Բաքուն Ֆրանսիայից հետո հիմա էլ դժգոհություններն է հայտնել Նիդերլանդների վերաբերյալ։ Պատճառն այն է, որ Նիդերլանդների կառավարության կայքում հրապարակված արտաքին քաղաքական ծրագրում Արցախը ներկայացվել է որպես Ադրբեջանի կողմից գրավված և օգտագործվել է Լեռնային Ղարաբաղ արտահայտությունը։

Ադրբեջանի ԱԳՆ-ն հայտարարություն է տարածել՝ նշելով, թե նիդերլանդական կողմը «հերթական անգամ կողմնակալ վերաբերմունք է ցուցաբերում Ադրբեջանի և հետհակամարտային շրջանում տարածաշրջանում առկա իրավիճակի նկատմամբ»։

ԱԳՆ խոսնակ Այխան Հաջիզադեի խոսքով՝ նախ անընդունելի է, որ Նիդերլանդներն Ադրբեջանի, իբր, «օկուպացված տարածքների ազատագրումն» անվանում է Լեռնային Ղարաբաղի գրավում։

«Ղարաբաղի շրջանը միշտ եղել է մեր երկրի անբաժանելի մասը և շուրջ 30 տարի գտնվել է Հայաստանի անօրինական օկուպացիայի տակ։ Ցավոք, Նիդերլանդներն աչք են փակել Հայաստանի անօրինական գործողությունների վրա։ Ադրբեջանի կողմից այդ տարածքների ազատագրման միջոցառումները հիմնված են միջազգային իրավունքի նորմերի և սկզբունքների, ինչպես նաև մեր երկրի ինքնիշխան իրավունքի վրա։ Մենք կոչ ենք անում Նիդերլանդներին վերջ տալ նման հայտարարություններին, որոնք է՛լ ավելի են խաթարում Ադրբեջանի և Նիդերլանդների երկկողմ հարաբերությունները և խոչընդոտում տարածաշրջանի հետագա զարգացմանը՝ միջազգային իրավունքի նորմերի ու սկզբունքների հարգման հիման վրա»,- ասել է Հաջիզադեն՝ փորձելով արդարացնել Բաքվի կողմից Արցախում իրականացված էթնիկ զտումը։

Հավելենք, որ վերջին շրջանում հակաֆրանսիական միջոցառումների հետ մեկտեղ, Բաքուն ակտիվորեն զբաղվում է նաև Նիդերլանդների դեմ արշավ իրականացնելով։

Էմմա Չոբանյան