27.05.2026 | 15:01
Պեսկովը հայտարարել է, թե «Հայաստանի համար գազի արտոնությունը ՌԴ-ի հաշվին է»
Կրասնոյարսկում 520 մարդու են ձերբակալել և զինկոմիսարիատի ծանուցումներ հանձնել․ նրանց թվում Ադրբեջանի քաղաքացիներ կան
Քաղաքականություն
16.09.2024 | 16:39
Կրասնոյարսկում ուժայինները ռեյդեր են անցկացրել տեղական շուկաներում, ինչի հետևանքով ձերբակալվել է 520 մարդ, այդ թվում՝ 417 օտարերկրացի։ Այս մասին հայտնում է Կրասնոյարսկի երկրամասի և Խակասիայի Հանրապետության քննչական կոմիտեի վարչությունը, որի նախաձեռնությամբ տեղի են ունեցել ստուգումները, փոխանցում է Current time-ը։
Ձերբակալվածների թվում են Ուզբեկստանի, Ադրբեջանի, Տաջիկստանի և Ղրղզստանի քաղաքացիներ։ Նշվում է, որ նրանք գտնվել են ՌԴ-ում «միգրանցիոն օրենսդրության խախտմամբ»։
«Այս անձանց վարչական պատասխանատվության ենթարկելու հարց է նախաձեռնվել, առնվազն յոթ անձի նկատմամբ լուծվում է վտարման հարցը»,- նշել են Քննչական կոմիտեից։
Ռեյդի ընթացքում ձերբակալվածներից 92-ն ունեցել են ՌԴ քաղաքացիություն, նրանց զինկոմիսարիատների ծանուցագրեր են հանձնել։
2024 թվականի օգոստոսին ՌԴ նախագահ Վլադիմիր Պուտինը ստորագրել է ՌԴ քաղաքացիություն ստանալուց հետո պարտադիր զինվորական գրանցման մասին օրենքը։ Այս պահանջը չկատարելը հիմք է դառնում Ռուսաստանի քաղաքացիությունից զրկելու համար։ Օրենքը հիմնականում վերաբերում է Կենտրոնական Ասիայի երկրներից միգրանտներին։
Անցյալ շաբաթ էլ ՌԴ ՆԳՆ-ն զինկոմիսարիատներից տեղեկատվություն էր խնդրել այն անձանց մասին, որոնք վերջերս ստացել են Ռուսաստանի քաղաքացիություն և զինվորական գրանցում չեն անցել։
