23.06.2026 | 00:27
Ամենամեծ էկրանով ստադիոնը, չսպասված երկրպագուներ. ԱԱ-2026-ի Բելգիա-Իրան խաղը` Factor TV-ի աչքերով
Գերմանիան միգրացիոն համաձայնագիր է կնքել Ուզբեկստանի հետ
Քաղաքականություն
16.09.2024 | 14:18
Ուզբեկստանի նախագահ Շավքաթ Միրզիյոևը և Գերմանիայի կանցլեր Օլաֆ Շոլցը միգրացիոն համաձայնագիր են ստորագրել Սամարղանդում նախօրեին անցկացված բանակցություններից հետո։ Այս մասին հայտնում է Ուզբեկստանի նախագահի աշխատակազմի մամուլի ծառայությունը։
Միգրացիոն համաձայնագիրը նպատակ ունի պարզեցնել հմուտ աշխատողների մուտքը Գերմանիա, հատկապես առողջապահության ոլորտում, ինչպես նաև Գերմանիայում մնալու իրավունք չունեցող ուզբեկների հայրենադարձության ընթացակարգը, գրում է գերմանական DPA գործակալությունը։
Ընդհանուր առմամբ, Գերմանիայում ապրում է Ուզբեկստանի 13,7 հազար քաղաքացի։
Շոլցը երկօրյա այցով Ուզբեկստան է ժամանել երեկ։ Ընդհանուր առմամբ, կողմերը ստորագրել են ութ երկկողմ փաստաթուղթ։ Դրանք ներառում են անասնաբուժության և անասնաբուծության ոլորտում համագործակցության, ջրային ռեսուրսների և կարևոր օգտակար հանածոների կայուն օգտագործման և տրանսպորտի ոլորտում համագործակցության մասին հռչակագրերը: Պայմանագրերի փաթեթ է կնքվել նաև Ուզբեկստանի և Գերմանիայի առաջատար ձեռնարկությունների միջև։
Նկատենք, որ Ռուսաստանի համար Ուզբեկստանը, Տաջիկստանը և Ղրղզստանն օտարերկրյա աշխատուժի հիմնական աղբյուրներն են։ Միգրացիոն նպատակով գրանցված բոլոր օտարերկրացիների կեսից ավելին (55-60%) մեկնում է աշխատանքի Մոսկվայում, Սանկտ Պետերբուրգում և ՌԴ այլ մարզերում։
