16.12.2025 | 20:45
Անհիմն են արգելվել ցույցերը․ 2020-ին հայտարարված ռազմական դրության հետքերով. ՏԵՍԱՆՅՈՒԹ
Վրաստանի վարչապետը շատ ամբիցիոզ ծրագիր առաջարկեց, և մենք լիովին պաշտպանում ենք այն. Փաշինյան
Քաղաքականություն
10.09.2018 | 15:59
Վրաստանի վարչապետի կողմից շատ ամբիցիոզ ծրագիր է առաջարկվել, և մենք լիովին պաշտպանում ենք այդ ծրագիրը: Այսօր պաշտոնական այցով Հայաստան ժամանած Վրաստանի վարչապետ Մամուկա Բախտաձեի հետ հանդիպումից հետո լրագրողների հետ հանդիպմանն այս մասին հայտարարեց ՀՀ վարչապետ Նիկոլ Փաշինյանը:
«Կոնկրետ խնդիր է ձևակերպվել՝ առաջիկա տարիների ընթացքում փոխադարձ առևտրաշրջանառությունը հասցնել 1 մլրդ դոլարի մակարդակի: Սա կոնկրետ թեմա է, որի նկատմամբ մենք բոլորս կարող ենք դիրքավորվել, ունենալ հստակ ճանապարհային քարտեզ և հստակ պայմանավորված քայլերով գնալ դեպի այդ խնդրի լուծումը»,- նշեց վարչապետը:
Երկու երկրների կառավարությունների ղեկավարները պայմանավորվել են առաջիկայում հայ-վրացական միջկառավարական հանձնաժողովի նիստ անցկացնել, որի ժամանակ հանձնաժողովի առջև խնդիր կդրվի՝ ձևավորել ճանապարհային քարտեզ՝ Հայաստանի և Վրաստանի առևտրատնտեսական, ինչպես նաև քաղաքական, կրթական, մշակութային, հումանիտար հարաբերությունները զարգացնելու համար:
«Ամեն դեպքում՝ կարող ենք արձանագրել, որ ամեն այցի հետ մեր երկրների հարաբերությունների մակարդակն ավելի է բարձրանում, մթնոլորտն ավելի բարեկամական և ջերմ է դառնում: Մեր կառավարությունների անդամների միջև հաստատվում, ամրապնդում են բարեկամական, ընկերական կապեր, ինչը պակաս կարևոր չէ երկրների հարաբերություններում»,- հավելեց Նիկոլ Փաշինյանը:
Վարչապետի համոզմամբ՝ Հայաստանի և Վրաստանի հարաբերությունները փայլուն են, և խնդիր կար, ընդհանուր առմամբ, այդ հարաբերությունների տնտեսական բաղադրիչը համապատասխանեցնել «բովանդակային և այն էմոցիոնալ մակարդակին, որ գոյություն ունի մեր ժողովուրդների միջև»:
«Մեր փոխայցելությունները պարբերական են և շարունակելու են պարբերական բնույթ կրել: Մենք շարունակելու ենք քննարկել մեր հարաբերություններին վերաբերող բազմաթիվ հարցեր՝ տրանսպորտային, տնտեսական, քաղաքական փոխգործակցության հարցեր: Կարծում եմ, որ ամենակարևոր արձանագրումն այն է, որ այս այցի արդյունքներով մենք նոր խթան կհաղորդենք մեր քաղաքական, հումանիտար և տնտեսական հարաբերություններին»,- եզրափակեց Հայաստանի վարչապետը:
