ՌԴ ՊՆ-ն հայտարարել է երկու օվկիանոսներում ու երեք ծովերում զորավարժությունների մեկնարկի մասին

Ռուսաստանի ռազմածովային ուժերը սկսել են «Օվկիանոս-2024» ռազմավարական զորավարժությունները: Այս մասին հայտնել է ՌԴ պաշտպանության նախարարությունը, փոխանցում է Meduza-ն։

Նշվում է, որ զորավարժություններն անցկացվելու են Խաղաղ և Հյուսիսային Սառուցյալ օվկիանոսների, Միջերկրական, Կասպից և Բալթիկ ծովերի ջրերում։ Դրանցում ներգրավվելու է ավելի քան 90,000 զինվորական, ավելի քան 400 ռազմանավ, սուզանավ, ռազմածովային և օդատիեզերական ուժերի ռազմածովային ավիացիայի ավելի քան 120 ինքնաթիռ և ուղղաթիռ, շուրջ 7000 միավոր սպառազինություն, ռազմական և հատուկ տեխնիկա։

ՌԴ ՊՆ-ն նշում է, որ զորավարժություններին նախատեսվում է օպերատիվ խմբեր ներգրավել ՆԳՆ-ից, ԱԻՆ-ից, ԱԴԾ-ից, Ազգային գվարդիայի և  Պահպանության դաշնային ծառայության զորքերից, ինչպես նաև Ռուսաստանի օտարերկրյա գործընկեր պետություններից ռազմական զորամիավորումներ»։

«Օվկիանոս-2024» զորավարժությունները տևելու են մինչև սեպտեմբերի 16-ը ներառյալ։

Առաջին փուլի շրջանակում նախատեսվում է մշակել զորախմբի տեղակայումը մարտական պատրաստության զորավարժարաններում։

«Երկրորդ փուլում մասնակիցները ներգրավվելու են «մարտական ​​գործողության» մեջ՝ պայմանական հակառակորդի  ռազմավարական նշանակության օբյեկտները և ուժերը խոցելու, ծովային դեսանտի իջեցման, ծովային տնտեսական գործունեության և ռազմավարական հաղորդակցությունների պաշտպանության համար՝ հաշվի առնելով ծովում զինված պայքարի ժամանակակից բնույթը»,- ասվում է հայտարարության մեջ։

Ավելի վաղ լրատվամիջոցները, հղում անելով Չինաստանի Պաշտպանության նախարարությանը, հայտնել էին, որ զորավարժությունների մասնակիցների թվում լինելու են այդ երկրի զինվորականները։