26.12.2025 | 23:15
Ալիևն Արցախում իր ընտանիքին պատկանող հերթական հյուրանոցն է բացել
Եվրահանձնաժողովի փոխնախագահը ժամանել է Հայաստան․ նա տալու է վիզայի ազատականացման երկխոսության մեկնարկը
Քաղաքականություն
09.09.2024 | 13:18
Հայաստան է ժամանել Եվրահանձնաժողովի փոխնախագահ Մարգարիտիս Սխինասը։ Այս մասին X-ի իր միկրոբլոգում հայտնել է ՀՀ-ում ԵՄ պատվիրակության ղեկավար, դեսպան Վասիլիս Մարագոսը։
«Ուրախ եմ ողջունել Եվրահանձնաժողոցի փոխնախագահ Մարգարիտիս Սխինասին Հայաստանում՝ բանակցությունների համար ՀՀ նախագահ Վահագն Խաչատուրյանի, վարչապետ Նիկոլ Փաշինյանի և ԱԳ նախարար Արարատ Միրզոյանի հետ՝ ամրապնդելու ՀՀ-ԵՄ գործընկերությունը և մեկնարկելու վիզայի ազատականացման երկխոսությունը»,- նշել է դեսպանը։
ԵՄ տարածած հաղորդագրության մեջ էլ ասվում է, որ ՀՀ փոխվարչապետ Մհեր Գրիգորյանի հետ քաղաքական մակարդակով վիզաների ազատականացման շուրջ երկխոսության մեկնարկն ուժեղ ազդանշան է ԵՄ-ի և նրա անդամ երկրների կողմից Բրյուսելի ու Երևանի միջև առանց այն էլ ամուր գործընկերության խորացման վճռականության մասին:
Այս երկխոսության նպատակը ԵՄ-ում կարճաժամկետ մնալու համար ՀՀ քաղաքացիների համար վիզային ռեժիմի մշտական վերացումն է, երբ Հայաստանի իշխանությունները զգալի բարեփոխումներ իրականացնեն այնպիսի հիմնական ոլորտներում, ինչպիսիք են ճամփորդական փաստաթղթերի անվտանգությունը, սահմանը, միգրացիան և ապաստանի կառավարումը, հասարակական կարգը և անվտանգությունը, ազատ տեղաշարժի հետ կապված հիմնական իրավունքները։
«Ինչպես ցույց է տվել երրորդ երկրների հետ փորձը՝ Հայաստանի հետ այս երկխոսությունը բազմամյա գործընթաց է լինելու, որը կիրականացվի ԵՄ անդամ երկրների հետ շատ սերտ համագործակցությամբ՝ վերահսկելու բարեփոխումների առաջընթացը և զարգացումները»,- ասվում է հայտարարության մեջ։
Բացի այդ, Եվրահանձնաժողովի փոխնախագահն այս այցի ընթացքում Երևանի պետական համալսարանի ուսանողների հետ քննարկելու է ԵՄ-ի և Հայաստանի հարաբերություններում վերջին շրջանում գրանցված զգալի առաջընթացը և ընդհանուր արժեքների վրա հիմնված դրանց հետագա խորացման հեռանկարները։
