Քաղաքականություն
26.08.2024 | 12:05
Ֆրանսիայում դատարանը 48 ժամով երկարացրել է Telegram մեսենջերի հիմնադիր Պավել Դուրովի կալանքը, հայտնում է AFP-ն՝ վկայակոչելով հետաքննությանը մոտ կանգնած աղբյուրին։
Գործակալությունը նշում է, որ կալանքը կարող է տևել առավելագույնը 96 ժամ, որից հետո դատավորը պետք է կա՛մ ազատ արձակի նրան, կա՛մ մեղադրանք առաջադրի։ Ֆրանսիական օրենքների համաձայն՝ կալանքի ժամկետը կարող է ավելացվել միայն մեկ անգամ։
Ֆրանսիայի իշխանությունները Դուրովի գործի վերաբերյալ պաշտոնական մեկնաբանություն չեն տվել։ Մեկնաբանություն է հրապարակել միայն Telegram-ի թիմը, որում ասվում է, որ ընկերության գործադիր տնօրենը թաքցնելու ոչինչ չունի, որ նա հաճախ է շրջագայում Եվրոպայով, իսկ Telegram-ը պահպանում է ԵՄ օրենքները, այդ թվում՝ թվային ծառայությունների մասին օրենքը։
Օգոստոսի 24-ի երեկոյան ֆրանսիական լրատվամիջոցները հայտնեցին, որ Telegram-ի հիմնադիր Պավել Դուրովը Ֆրանսիա ժամանելուն պես ձերբակալվել է Լե Բուրժե օդանավակայանում։ Նա բերման է ենթարկվել և հարցաքննվել։ Դուրովը մասնավոր ինքնաթիռով ժամանել էր Ադրբեջանից։
