Բորելը կոչ է արել վերացնել ՌԴ-ի ռազմական օբյեկտների վրա հարձակումների համար արևմտյան զինատեսակների կիրառման սահմանափակումները

Եվրոպական դիվանագիտության ղեկավար Ժոզեպ Բորելն աջակցում է Ռուսաստանում ռազմական օբյեկտներին հարվածելու ցանկացած սահմանափակումների վերացմանը, քանի որ դա կօգնի Վլադիմիր Պուտինին համոզել՝ խաղաղության բանակցություններ վարել։ X սոցիալական ցանցում դիվանագետը գրել է, որ ուկրաինական հարձակողական գործողությունը Կուրսկի շրջանում լուրջ հարված է ՌԴ նախագահի դիրքերին ևԿիևի կողմից արևմտյան զենքի օգտագործման ներկայիս արգելքի վերացումը կունենա մի քանի կարևոր հետևանք․ կուժեղացնի ուկրաինական պաշտպանությունը և կզրկի Ռուսաստանին ուկրաինական քաղաքներն ու նրա քաղաքացիական ենթակառուցվածքները ոչնչացնելու հնարավորությունից, կփրկի մեծ թվով մարդկանց կյանքեր և կնվազեցնի ավերածությունների ծավալները։ Այն նաև կօգնի «խաղաղության ջանքերն առաջ մղել»։

«Ես ասել եմ Ուկրաինայի արտգործնախարար Դմիտրի Կուլեբային, որ ԵՄ-ն լիովին աջակցում է Ուկրաինային ռուսական ագրեսիայի դեմ պայքարում։ Ես անհամբեր սպասում եմ Բրյուսելում նրա հետ հանդիպմանը և հաջորդ շաբաթ ԵՄ արտաքին գործերի ու պաշտպանության նախարարների հետ քննարկմանը՝ Ուկրաինային աջակցելու հարցում առաջ շարժվելու համար»,- նշել է Բորելը:

Արևմուտքը Ուկրաինային զենք է մատակարարում, այդ թվում՝ հեռահար հրթիռներ՝ ռուսական ագրեսիային հակազդելու համար։ Սկզբում Ուկրաինայի զինված ուժերին արգելված էր օգտագործել այդ զենքերը Ռուսաստանի Դաշնության տարածքում գտնվող թիրախների դեմ, քանի որ արևմտյան երկրները վախենում էին հակամարտության սրացումից, սակայն Խարկովի մարզում ռուսական բանակի հարձակումից հետո սահմանափակումը մասամբ հանվեց։