27.05.2026 | 21:52
Կօգտագործեմ լծակներս, որ Լուկաշենկոն ԵԱՏՄ-ն չկարողանա օգտագործել Հայաստանի դեմ. Փաշինյան. ՏԵՍԱՆՅՈՒԹ
Կոռուպցիոն ռիսկ կա, երբ 180․000 դոլար հատկացնում են Երևանի մասին 15 երգի ձայնագրման համար․ Հայկ Գրիգորյան․ ՏԵՍԱՆՅՈՒԹ
Քաղաքականություն
20.08.2024 | 20:00
Երևանի քաղաքապետի առաջին տեղակալ Արմեն Փամբուխչյանի ստորագրած կարգադրության համաձայն՝ հարկատուների գրպանից շուրջ 180 հազար դոլար կհատկացվի Երևան քաղաքի 2024 թվականի տոնակատարություններին նվիրված 15 սիրված երգերի նորացված կատարումների ձայնագրությունների, ինչպես նաև 1 նոր երգի և տեսահոլովակի ստեղծման համար: Երևանի ավագանու «Ազգային առաջընթաց» խմբակցության անդամ Հայկ Գրիգորյանը Factor TV-ի հետ զրույցում նշում է, որ սա հարկատուների գումարի վատնում է։
«Բնականաբար, սա անհրաժեշտ ծախս չէ, քաղաքապետարանի այս գործելաոճն էլ նորություն չէ։ Սա կոռուպցիոն դասական սխեմա է»,- ասում է ավագանու անդամը։
Երևանի քաղաքապետարանից չեն հայտնում, թե ինչպես է 15 երգերի ձայնագրությունների, մեկ նոր երգի տեսահոլովակի համար ընտրվել մի ընկերություն՝ «Կոմբինատ Փրոդաքշն»-ը, որը պետական որևէ կառույցի ծառայություն դեռ չի մատուցել և ինչ-ինչ հարցերում իր պարտավարությունները չի կատարել։
«Կոմբինատ Փրոդաքշն»-ի հիմնադիրն ու տնօրենը մինչ օրս Լիլիթ Մարտիրոսյանն է, որը մասնակցություն ունի մի քանի ընկերություններում։ Դրանցից հանրությանն առավել հայտնի է «Շարմ Հոլդինգ» ընկերությունը, որտեղ նա տնօրենի ժամանակավոր պաշտոնակատար է։
«Շարմ Հոլդինգ»-ի 50% բաժնեմասի սեփականատերը Ռուբեն Ջաղինյանն է, որի հետ փոխկապակցված է նաև մեծ աղմուկ հանած «Ֆակտորի փրոդաքշն» ընկերությունը, որի հետ առանց մրցույթի բազմամիլիոնանոց պայմանագրեր են կնքել թե՛ Երևանի քաղաքապետարանը, թե՛ կառավարությունը։ «Ֆակտորի փրոդաքշն»-ի հիմնադիրներն են Վազգեն Պողոսյանը և Ռուդիկ Տեր-Գալստյանը, որոնք աշխատել են «Շարմ հոլդինգ» ՍՊԸ-ում, Հանրային հեռուստաընկերությունում, երբ վերջինի ղեկավարը Ռուբեն Ջաղինյանն է եղել։
Հայկ Գրիգորյանը սա ևս խնդրահարույց է համարում, ընդգծում է՝ այստեղ կոռուպցիոն ռիսկ կա և, նրա պնդմամբ, քաղաքապետարանում գործում է կոռուպցիոն սխեմա։
Հարցազրույցն ամբողջությամբ՝ տեսանյութում։
Արփի Հակոբյան
