Մենք չունենք ազգային ծրագիր, բիզնեսն է թելադրում, թե ոնց զարգանա Երևանը, դա դարձել է նորմա. Բալյան. ՏԵՍԱՆՅՈՒԹ

«Երևանի նոր գլխավոր հատակագիծը մշակողները բնավ չեն ձգտել լսել մասնագետների կարծիքը: Բացի այդ` չի տրվել հստակ գնահատական քաղաքաշինական այն սխալներին, որոնք նախկինում արվել են: Մենք շարունակում ենք կառուցապատել կենտրոնը բնակելի շենքերով, սեղմում ենք հանրային տարածքները, ոչնչացնում պատմական հուշարձանները, ունենք էկոլոգիական լուրջ խնդիրներ»,- Factor TV-ի հետ զրույցում նշում է ճարտարապետ Կարեն Բալյանը` անդրադառնալով 8 ամսում մշակված Երևանի նոր գլխավոր հատակագծին:

Նա խոսում է նաև Սարյան փողոցում «Հայփոստ»-ի վարչական մասնաշենքի տեղում նախատեսվող «Համաշխարհային առևտրի կենտրոնի» մասին. «Վախենամ` համաշխարհային այդ կենտրոնը ոչնչացնի Կոնդը: Բայց Կոնդը դիմադրեց, նույնիսկ երբ հարակից տարածքում կառուցվեցին բարձրահարկ շենքեր, երբ կառուցվեց Դվին հյուրանոցը: Կոնդը մինչև օրս էլ դիմադրում է: Այդ միջավայրը պետք է կենդանի պահել, կենտրոնը չպետք է ոչնչացնի Կոնդը»:

Ինչ վերաբերում է Օրբելի-Բաղրամյան խաչմերուկում 35000ք/մ տարածքում 2026-ի վերջին վեր խոյանալիք 35 հարկանի 5 շենքերին, ճարտարապետը նկատում է. «Շատ վատ եմ վերաբերվում դրան: Այդ 5 երկնաքերերը դեպի Մասիս բոլոր շենքերից բացվող պատկերը փակելու են: Այդ շենքերը նույնիսկ իրենց բնակիչների համար շահեկան չեն լինելու. դրանք կվաճառվեն նրանց որպես շինություններ, որոնց առջև փռված պիտի լինի Երևանը, Արարատը, Արագածը, բայց բնակարանների մեծ մասից դրանք չեն երևալու»:

Կարեն Բալյանը շեշտում է, որ Երևանը կորցրել է իր դիմագիծը, կերպարը, և երևանցիներն այսօր չեն հանդիպում իրար, քանի որ չկան հանրային տարածքներ. «Մենք չունենք ազգային ծրագիր, բիզնեսն է թելադրում, թե ոնց զարգանա Երևանը, և դա դարձել է նորմա: Բայց հակառակը պետք է լիներ, ազգային ծրագիրը պետք է թելադրեր` ինչպիսին լիներ բիզնես ծրագիրը: Բիզնես-գործունեությունն ի նպաստ քաղաքի պետք է լինի»:

Մանրամասները`տեսանյութում:

Աննա Բաբաջանյան