18.12.2025 | 21:24
Պաշտոնական այցերից ինչ նվերներով են վերադարձել ԱԺ նախագահը, ԱԳ նախարարն ու ԱԽ քարտուղարը
Հայ-ռուսական հարաբերություններում կան խնդիրներ, որոնք չտեսնելն անհնար է․ Սամվել Ֆարմանյան
Քաղաքականություն
06.09.2018 | 13:16
Ազգային ժողովի ՀՀԿ խմբակցության պատգամավոր Սամվել Ֆարմանյանն այսօր խորհրդարանում լրագրողների հետ ճեպազրույցում, անդրադառնալով հայ-ռուսական հարաբերություններին, նշեց, որ դրանք առաջնային նշանակություն ունեն մեզ համար՝ անկախ նրանից, թե որ քաղաքական ուժն է գտնվում իշխանության, ուստի ինքն իր գործընկերների հետ որոշ մտահոգություններ է հայտնել այդ հարաբերությունների վերաբերյալ։
«Մենք մեր մտահոգությունն ենք հայտնել Հայաստան-Ռուսաստան հարաբերություններում Նիկոլ Փաշինյանի վարչապետության օրոք տեղ գտած իրողությունների առթիվ: Ես հուսով եմ, որ բոլոր գործողությունները, որոնք մեր իշխանությունների կողմից ձեռնարկվում են կամ կձեռնարկվեն, դրանք կբխեն բացառապես Հայաստանի Հանրապետության ազգային պետական երկարատև շահերից և կլինեն նախորդ փորձի համակողմանի ուսումնասիրությունից բխող որոշումներ: Եվ ի վերջո, գուցե մի օր վերանան նաև այն խութերը, այն չհասկացվածությունը, որոնք արտահայտում էի ոչ միայն ես, այլ նաև շատ փորձագետներ»,- ասաց պատգամավորը։
Վերջինս հույս հայտնեց, որ հայ-ռուսական հարաբերությունների շրջանակում ձեռք բերված պայմանավորվածությունները գետնի վրա չեն մնա և հիշեցրեց, որ մայիսի 8-ից հետո խորհրդարանում իր առաջին և վերջին ելույթը վերաբերել է հայ-ռուսական հարաբերություններին և գործող իշխանություններին էլ խորհուրդ է տվել ամեն մի որոշում կայացնելիս երկար ծանր ու թեթև անել։
Սամվել Ֆարմանյանը ևս մեկ անգամ նկատեց՝ հայ-ռուսական հարաբերություններում կան խնդիրներ, որոնք չտեսնելն աննար է։
