16.03.2026 | 14:26
Հունահռոմեական ոճի ըմբշամարտի Հայաստանի Մ-23 հավաքականը 2-րդն է ԵԱ-ի թիմային պայքարում․ ԼՈՒՍԱՆԿԱՐ
Amnesty International-ը Վրաստանին կոչ է անում Բաքվի կողմից հետապնդվող լրագրողին չարտահանձնել
Քաղաքականություն
06.08.2024 | 16:38
Amnesty International միջազգային իրավապաշտպան կազմակերպությունը կոչ է արել Վրաստանի իշխանություններին դադարեցնել օգոստոսի 3-ին ձերբակալված և բանտում պահվող ադրբեջանցի լրագրող Աֆղան Սադիգովի արտահանձնման գործընթացը, գրում են ադրբեջանական լրատվամիջոցները։
Amnesty International-ի Արևելյան Եվրոպայի և Կենտրոնական Ասիայի գծով փոխտնօրեն Դենիս Կրիվոշեևն ասել է, որ Վրաստանի կառավարությունը պետք է հարգի իր միջազգային պարտավորությունները և չվերադարձման սկզբունքը՝ կանխելով Սադիգովի արտահանձնումն Ադրբեջանին։
«Ադրբեջան արտահանձնումը նրան կդնի մարդու իրավունքների լուրջ խախտումների, ներառյալ՝ խոշտանգումների, կամայական կալանավորման և անարդար դատավարության վտանգի տակ: Սադիգովի գործը շարունակում է Ադրբեջանում անկախ լրատվամիջոցներին ճնշելու միտումը։ Հիմա ճնշումն ուժեղացել է մինչև COP29-ը»,- ասել է նա։
Կազմակերպությունը նաև կոչ է արել Ադրբեջանի իշխանություններին դադարեցնել քաղաքական դրդապատճառներով գործողությունները լրագրողների և քննադատների դեմ՝ պահանջելով անհապաղ ազատ արձակել նրանց, որոնք բանտարկված են բացառապես խոսքի ազատության իրենց իրավունքն իրացնելու համար:
Amnesty International-ն ընդգծել է, որ անկախ լրագրողները, ակտիվիստները և իրավապաշտպաններն ավելի ու ավելի են ենթարկվում շինծու մեղադրանքների COP29-ին ընդառաջ:
Նշենք, որ Թբիլիսիի դատարանն օգոստոսի 4-ին որոշում է կայացրել Azel.TV կայքի ղեկավար Աֆղան Սադիգովին 2 ամսով կալանավորելու մասին։ Այս որոշման դեմ բողոք է ներկայացվել։ Ադրբեջանական լրատվամիջոցներին այս մասին հայտնել է նրա կինը՝ Սևինջ Սադիգովան։ Դեռևս օգոստոսի 3-ին կինը ֆեյսբուքյան ուղիղ եթերում հայտնել էր Սադիգովի ձերբակալության մասին։ Նա ասել է, որ դա տեղի է ունեցել իր և իր երեխաների աչքի առաջ, երբ միասին դուրս են եկել տնից։ Կինը կարծում է, որ իր ամուսնուն ձերբակալել է վրացական ոստիկանությունը՝ Ադրբեջանի իշխանությունների հրահանգով։
Սադիգովան վստահ է, որ ամուսնուն կալանավորել են Ադրբեջանի նախագահ Իլհամ Ալիևի հրահանգով։
«Վրաստանի իրավապահները հետևում են Ադրբեջանի բռնապետի հրահանգներին»,- ասել է նա։
Հուլիսի 18-ին Սադիգովին Թբիլիսիի օդանավակայանում թույլ չէին տվել Անկարա թռչել։ Նրան ձերբակալել էին սահմանային և անձնագրային հսկողության կետում։ Սադիգովի խոսքով՝ իրեն ասել են, որ բացի Ադրբեջանից՝ այլ երկիր գնալ չի կարող գնալ։
Նա Վրաստանում է ապրում անցյալ տարվա դեկտեմբերի 24-ից։ Սադիգովը բուժման նպատակով գնացել է Վրաստան, սակայն սպառնալիքների պատճառով չի վերադարձել Ադրբեջան։ Նա նախկինում կալանավորվել է 2020 թվականի մայիսին՝ շորթման մեղադրանքով։ 2020-ի նոյեմբերի 3-ին դատարանը նրան դատապարտել է 7 տարվա ազատազրկման։ Վերաքննիչ դատարանը պատիժը կրճատել է մինչև 6 տարի, իսկ Գերագույն դատարանը՝ 4 տարի։ 2022 թվականի մայիսին նրան ներում է շնորհվել։ Տեղական իրավապաշտպանները Սադիգովին ճանաչել են որպես քաղբանտարկյալ։
Էմմա Չոբանյան
