Քաղաքականություն
02.08.2024 | 10:56
Զինված ուժերի բարեփոխումների գործընթացի շրջանակներում ՀՀ պաշտպանության նախարարությունը ԱՄՆ-ից և այլ միջազգային գործընկերներից ստացել և ստանում է խորհրդատվական աջակցություն, որը կարող է կրել կարճաժամկետ կամ երկարաժամկետ բնույթ։ Այս մասին Factor.am-ի գրավոր հարցմանն ի պատասխան տեղեկացրել են ՀՀ ՊՆ-ից՝ պատասխանելով հարցին՝ ե՞րբ է ԱՄՆ ներկայացուցիչը աշխատանքը սկսելու Հայաստանի պաշտպանության նախարարությունում և ի՞նչ գործառույթ է իրականացնելու։
Թեմայի վերաբերյալ ռազմական գերատեսչությանն ուղղված այլ հարցերի մասով էլ նշել են, որ ամերիկյան կողմն արդեն հանդես է եկել պարզաբանումներով։
Նշենք, որ ամերիկյան բանակի ներկայացուցչի՝ Հայաստանի պաշտպանության նախարարությունում աշխատանքի անցնելու վերաբերյալ Factor.am-ը գրավոր հարցում էր ուղղել նաև ՀՀ-ում ԱՄՆ դեսպանատուն։ Դեսպանատնից հարցմանն ի պատասխան հայտնել էին, որ ԱՄՆ պետքարտուղարության քաղաքացիական խորհրդատուի ընտրությունը կատարված է, և այս տարի ավելի ուշ նա աշխատանքի կանցնի։ Նաև փոխանցել էին, որ խորհրդատուն աշխատելու է Հայաստանում՝ կանոնավոր աշխատանքային շփումներ ունենալով դեսպանության և պաշտպանության նախարարության հետ։
Մեր գրավոր հարցման պատասխանում նշել էին, որ խորհրդատվական աջակցության միջոցով Միացյալ Նահանգները մտադիր է օգնել Հայաստանին անվտանգության ոլորտի կառավարման բարելավման հարցում, որն էլ իր հերթին կնպաստի հայ-ամերիկյան հարաբերությունների ամրապնդմանը։
Հիշեցնենք, որ քաղաքացիական անվտանգության, ժողովրդավարության և մարդու իրավունքների հարցերով ԱՄՆ պետքարտուղարի տեղակալ Ըզրա Զեյան «Հետք»-ի հետ զրույցում հաստատել էր այն տեղեկությունը, թե որոշում կա, որ ամերիկյան բանակի ներկայացուցիչ կաշխատի Հայաստանի պաշտպանության նախարարությունում։
Մանյա Պողոսյան
