26.09.2026 | 20:38
Քաղաքացին ընկել է ջրհորը. նա հոսպիտալացվել է
1 մլն դրամի ծախս՝ առանց մրցույթի՝ թիմակառուցողության (teambuilding) խաղերի համար․ Ֆինանսների նախարարության գնումը
01.08.2024 | 10:54
ՀՀ ֆինանսների նախարարությունը 1 մլն դրամ է ծախսել իր աշխատակիցների համար թիմակառուցողության խաղ-վարժանքների կազմակերպման և անցկացման (teambuilding) նպատակով։
Ուշագրավ է, որ նախարարությունը, որ մրցակցային պետական գնումների առաջամարտիկը պետք է լիներ, այս ծառայությունը ձեռք է բերել մեկ անձից գնման ընթացակարգով, այսինքն՝ առանց մրցույթի։
Նախարարությունը 1 մլն-անոց պայմանագիրը կնքել է Սամվել Աղաջանյան Ա/Ձ-ի հետ հուլիսի 29-ին։ Ըստ պայմանագրի՝ Աղաջանյանը պետք է փաստաթղթի կնքումից օրեր առաջ՝ հուլիսի 27-ին, 3 ժամ տևողությամբ (ժամը 14։00-ից մինչև 17։00) խաղեր կազմակերպեր առնվազն 210 մասնակցի համար՝ թիմակառուցողական, հաղորդակցության հմտությունների և այլ կոմպետենցիաների զարգացման նպատակով։ Խաղերի անցկացման վայր էր ընտրվել Հրազդանի Վարդենի հյուրատունը։
Սամվել Աղաջանյանը Armenian GAME Changers-ի հիմնադիրն է և զբաղվում է թիմային կարողությունների զարգացմամբ։
Ֆինանսների նախարարության աշխատակիցների համար անհատ ձեռնարկատերը համանման խաղեր էր կազմակերպել նաև 1 տարի առաջ։ Այդ ժամանակ ևս նախարարությունն առանց մրցույթի պայմանագիր էր կնքել Աղաջանյանի հետ՝ 550 հազար դրամով։ Խաղերին պետք է մասնակցեր առնվազն 120 աշխատակից։
Թե կեցության համար ինչքա՞ն է վճարել նախարարությունը, էլեկտրոնային գնումների Armeps համակարգում համապատասխան պայմանագիր գտնել չհաջողվեց։ Համացանցում առկա տեղեկատվության համաձայն՝ «Վարդենի» հյուրատունը 1 անձի 1 օրվա կեցությունն արժե մոտ 20 հազար դրամ։
Աշխատակիցների տեղափոխման նպատակով նախարարությունը հուլիսի 22-ին, կրկին առանց մրցույթի՝ մեկ անձից ընթացակարգով, պայմանագիր էր կնքել «Բաս Վոյաժ» ընկերության հետ։ 11 միկրոավտոբուսներով Երևան-Հրազդան-Երևան երկկողմանի երթուղու ապահովման համար նախարարությունն ընկերությանը վճարել է 660 հազար դրամ։
Գայանե Խաչատրյան
