09.09.2026 | 14:41
Իսրայելը կփակի Մեծ Բրիտանիայի հյուպատոսությունը Երուսաղեմում՝ ի պատասխան Լոնդոնի պատժամիջոցների
Թուրքիան Ղարաբաղում Ադրբեջանին օգնել է ԱԹՍ-ներով, զինամթերքով և ռազմական հրահանգիչներով. Bild-ի անդրադարձը
Քաղաքականություն
31.07.2024 | 14:50
Գերմանական Bild-ն անդրադարձել է Արցախի մասին Թուրքիայի նախագահ Ռեջեփ Թայիփ Էրդողանի հայտարարությանը։
«Ինչպես մտանք Ղարաբաղ և Լիբիա, նույնը կանենք նրանց հետ»,- ասել է Թուրքիայի ղեկավարն Իսրայելին ուղղված սպառնալիքների համատեքստում։
Ըստ հրապարակման՝ խոսքը երկու հակամարտությունների մասին է, որոնցում Թուրքիան ռազմական միջամտություն է ունեցել։
Bild-ի փոխանցմամբ՝ Լեռնային Ղարաբաղի համար պատերազմում Անկարան Ադրբեջանին աջակցել է անօդաչու սարքերով, զինամթերքով և ռազմական հրահանգիչներով։ Լիբիայում թուրք զինվորներն անցել են միջազգայնորեն ճանաչված կառավարության կողմը՝ ընդդեմ գեներալ Հաֆթարի զորքերի։
Թուրքիան ունի ժամանակակից սարքավորումներով զինված մեծ բանակ, որի թվաքանակը կազմում է 450 հազար գործող զինվորականից մի փոքր պակաս։ Թուրքական բանակը գործում է հարևան Իրաքում և Սիրիայում, որտեղ մի քանի ռազմակայաններ ունի։ Մի քանի տասնյակ հազար թուրք զինվորներ նաև տեղակայված են Կիպրոսի օկուպացված հյուսիսային հատվածում։ Թուրքիայի հարցերով փորձագետ Էրեն Գուվերչինը նշում է, որ Էրդողանը դժվար թե ի վիճակի է իրական ռազմական գործողությունների անցնելու։
«Էրդողանը միտումնավոր կրակի հետ է խաղում։ Նա մի կողմից ցանկանում է երկրի ներսում ուժեղ մարդու կերպարով հանդես գալ, մյուս կողմից՝ իրեն ներկայացնել որպես, այսպես կոչված, իսլամական աշխարհի առաջնորդ»,- կարծում է Գուվերչինը։
Foundation for Defense of Democracies ամերիկյան հիմնադրամի ռազմական փորձագետ Սեթ Ֆրանցմանը կարծում է, որ Էրդողանն օգտագործում է իր սպառնալիքները ներքաղաքական նպատակներով՝ «մկանները մարզելու համար»։
«Սակայն ՆԱՏՕ-ի անդամ Թուրքիան չպետք է սպառնա Իսրայելին ռազմական գործողություններով, նույնիսկ եթե դա պարծենալու հարց է։ Ուղղակի ռազմական էսկալացիան քիչ հավանական է. արևմտյան երկրները կհամոզեն Անկարային չձեռնարկել Իսրայելի դեմ ռազմական գործողություններ: Այնուամենայնիվ, հաշվի առնելով Թուրքիայի պատրաստակամությունը՝ ընդլայնելու իր ռազմական նվաճումները Աֆրիկայում և Մերձավոր Արևելքի որոշ հատվածներում, նրա սպառնալիքներին միշտ պետք է լուրջ վերաբերվել»,- ասել է Ֆրանցմանը:
