01.05.2026 | 11:31
«Աշխատանքն ու աշխատողն այսօր․ մարտահրավերներն ու առաջնահերթությունները». ՈՒՂԻՂ
Պեսկովը չի մեկնաբանել WSJ-ի լրագրող Գերշկովիչի փոխանակման հեռանկարը
Քաղաքականություն
22.07.2024 | 18:31
ՌԴ նախագահի մամուլի քարտուղար Դմիտրի Պեսկովը հրաժարվել է մեկնաբանել The Wall Street Journal-ի (WSJ) լրագրող Էվան Գերշկովիչի փոխանակման հնարավորությունը։ Հուլիսի 19-ին Սվերդլովսկի շրջանային դատարանը նրան մեղավոր է ճանաչել լրտեսության մեջ (ՌԴ Քրեական օրենսգրքի 276-րդ հոդված) և դատապարտել 16 տարվա ազատազրկման խիստ ռեժիմի գաղութում, փոխանցում է «Կոմերսանտը»։
Ճեպազրույցում լրագրողները Դմիտրի Պեսկովին հարցրել են՝ արդյո՞ք Էվան Գերշկովիչի «անսպասելի արագ» դատավճիռը ցույց է տալիս, որ նրա փոխանակման հարցը կարող է լուծվել մինչև նոյեմբերին կայանալիք ԱՄՆ նախագահական ընտրությունները։
«Ես ոչինչ չունեմ այս հարցին պատասխանելու, այն թողնում եմ անպատասխան»,- ասել է Դմիտրի Պեսկովը։
Էվան Գերշկովիչը կալանքի տակ է 2023 թվականի մարտի 30-ից։ Գործի դատաքննությունը սկսվել էր 2024 թվականի հունիսի 26-ին։ Սվերդլովսկի շրջանային դատարանը լրագրողի նկատմամբ դատավճիռը հրապարակել էր արդեն հուլիսի 19-ին։
Հետաքննությունը պարզել է, որ «Էվան Գերշկովիչը ԿՀՎ-ի հանձնարարությամբ գաղտնի տեղեկատվություն է հավաքել «Ուրալվագոնզավոդի» աշխատանքի մասին»։ WSJ-ի խմբագիրները հայտարարել են, որ նա Սվերդլովսկի մարզում եղել է լրագրողական նյութեր գրելու նպատակով։
