07.10.2026 | 18:03
ԵՄ դեսպանները համաձայնեցրել են ՌԴ-ի դեմ պատժամիջոցների նոր՝ ռեկորդային ցուցակը
«Սա աղետ է Ուկրաինայի համար». Եվրոպան արձագանքել է Թրամփի կողմից Վենսին որպես ԱՄՆ փոխնախագահ առաջադրելուն
Քաղաքականություն
16.07.2024 | 14:46
«Սա աղետ է Ուկրաինայի համար»․ սրանք ԵՄ բարձրաստիճան պաշտոնյաներից մեկի խոսքերն են՝ ի պատասխան հանրապետականների նախագահի թեկնածու Դոնալդ Թրամփի կողմից Օհայոյից սենատոր Ջեյմս Վենսին որպես փոխնախագահի թեկնածու առաջադրելուն, գրում է Politico-ն։
Մինչ Եվրոպան արդեն իսկ խուճապի է մատնվել Թրամփի երկրորդ նախագահության և ԱՄՆ արտաքին քաղաքականության վրա դրա հետևանքների հնարավորության հետ կապված, Վենսի առաջադրումը լրացուցիչ հարցեր է առաջացրել Ուկրաինայի և անդրատլանտյան դաշինքի նկատմամբ հնարավոր նոր վարչակազմի հավատարմության վերաբերյալ:
Վենսը հստակ արտահայտել է իր տեսակետը Ուկրաինայի պատերազմի վերաբերյալ։
«Ես պետք է ազնիվ լինեմ, ինձ այնքան էլ չի հետաքրքրում, թե այս կամ այն կերպ ինչ կլինի Ուկրաինայի հետ»,- հայտարարել էր նա 2022 թվականին տված հարցազրույցում։
2024 թվականի փետրվարին, երբ Վենսն առաջին անգամ ելույթ էր ունենում Մյունխենի անվտանգության համաժողովում, Politico-ին ասել է, որ ԱՄՆ-ը պետք է վերագնահատի իր աջակցությունն Ուկրաինային։ Նա նաև բաց է թողել հանդիպումը Ուկրաինայի պատվիրակության հետ:
Դրանից հետո նրա հռետորաբանությունն է՛լ ավելի է կոշտացել։ 39-ամյա սենատորը քննադատել է Եվրոպայի կախվածությունն ԱՄՆ-ից ռազմական ծախսերի հարցում, ինչպես նաև Գերմանիային, մասնավորապես, ՆԱՏՕ-ի պաշտպանական ծախսերի ՀՆԱ-ի 2 տոկոսի նպատակակետը չկատարելու համար։
