22.11.2024 | 19:31
Լուկաշենկոն սպառնացել է «ամբողջությամբ ինտերնետը անջատել» բողոքի ակցիաների դեպքում
ՌԴ-ն ի՞նչ է ուզում, ՀՀ-ն ինքնասպանությա՞ն գնա, զենք չգնի․ Արևմուտքի հետ անվտանգային գործակցությամբ՝ այլընտրանք ենք փնտրում․ Գայանե Աբրահամյան․ ՏԵՍԱՆՅՈՒԹ
Քաղաքականություն
12.07.2024 | 22:00
Մոսկվան հայտարարում է, թե մտահոգված է, որ Երևանի հավանությամբ ԵՄ առաքելությունը ոչ միայն ընդլայնվում է, այլ սպառնում է ժամանակավորից դառնալ մշտական, «ՌԻԱ Նովոստի»-ին ասել է Ռուսաստանի փոխարտգործնախարար Միխայիլ Գալուզինը։
Ըստ նրա՝ ապրիլից առաքելության կազմում նաև Կանադայի ներկայացուցիչների առկայությունը «դե ֆակտո նշանակում է ՆԱՏՕ-ի սողացող ներթափանցում Հարավային Կովկաս»։ Նույն ագրեսիվությունը Մոսկվայից և Բաքվից կա նաև Արևմուտքի հետ անվտանգային գործակցության նկատմամբ, «Սեզար» հրետանանային համակարգերի վաճառքի դեմ ագրեսիվ խոսեցին Ադրբեջանը և ՌԴ-ն։
Ընդգծելով, որ Հայաստանը մնում է ՀԱՊԿ անդամ, Գալուզինը նշել է, թե Հայաստանը ռազմական և ռազմատեխնիկական ոլորտներում բազմաթիվ երկկողմ պայմանագրերի կողմ է հանդիսանում․ «Մտահոգությունների շուրջ կառուցողական քննարկումներ ունենալու փոխարեն, ցավոք, Երևանն այլ ճանապարհ է ընտրել»։
Ռուսաստանի փոխարտգործնախարարը նկատել է, որ Հայաստանը գերադասում է մեծացնել փոխգործակցությունը ՆԱՏՕ-ի կամ դաշինքի առանձին անդամների հետ, հատկապես՝ ՆԱՏՕ-ի չափանիշների ներդրման, զենքի գնման կամ համատեղ մարտական պատրաստության աշխատանքների իրականացման առումով։ Գալուզինը մեղադրել է Երևանին «երկու աթոռի վրա նստելու փորձի» համար․ «Այսպիսի տեմպերով խորացնելով համագործակցությունը նրանց հետ, ում նպատակը Ռուսաստանի «ռազմավարական պարտությունն է», Երևանը սեփական ձեռքերով ռիսկի է դիմում՝ ապակայունացնելու իրավիճակը Հարավային Կովկասում՝ ի վնաս սեփական անվտանգության»։
«Հանուն հավասար իրավունքների կենտրոն» ՀԿ ղեկավար Գայանե Աբրահամյանը Factor TV-ի հետ զրույցում ասում է, որ ՌԴ-ն անհանգստանում է, որ ՀՀ-ն կարող է դուրս գալ իր ազդեցության գոտուց։
«ՌԴ-ն ի՞նչ է ուզում, որ ՀՀ-ն ինքնասպանությա՞ն գնա, զենք չգնի, երբ ինքը չի վաճառում։ Արևմուտքի հետ անվտանգային գործակցությամբ ՀՀ-ն այլընտրանքներ է փնտրում։ ՌԴ-ն շատ նյարդային է՝ ՀՀ-ն Արևմուտքի միջոցով անվտանգային այլընտրանքներ է գտնում, և իրականում Ռուսաստանը վախ ունի, որ իրենից մեր կախվածությունը նվազի։ ՀՀ-ն վտանգավոր իրավիճակում է, ՌԴ-ի կողմ գնալը է՛լ ավելի վտանգավոր է, ոչինչ չանելը մեր պետության ոչնչացում է նշանակում։ ՌԴ-ն նյարդային է ԵՄ դիտորդների ներկայությունից, քանի որ ցանկանում էր Հայաստանում ՀԱՊԿ-ի դիտորդներ տեղակայել, ինչը տեղի չունեցավ»,- նշեց Գայանե Աբրահամյանը։
Հարցազրույցն ամբողջությամբ՝ տեսանյութում։
Ռոբերտ Անանյան
