Քաղաքականություն
11.07.2024 | 21:58
ԱՄՆ-ում գտնվող Թուրքիայի նախագահ Ռեջեփ Թայիփ Էրդողանը հարցազրույց է տվել Newsweek-ին, որում անդրադառնալով ռուս-ուկրաինական պատերազմին և ՆԱՏՕ-ի ու Ռուսաստանի միջև «ուղիղ հակամարտության հնարավորության» մասին հարցին՝ հիշեցրել է, որ Թուրքիան հենց սկզբից հայտարարել է՝ չի լինելու այս պատերազմի կողմ։
«Մեր դիրքորոշումը միայն խաղաղության օգտին է։ Լուծումը ոչ թե ավելի շատ արյունահեղության ու տառապանքի, այլ երկխոսության միջոցով ձեռք բերված մշտական խաղաղության մեջ է»,- ասել է Թուրքիայի նախագահը։
Նա նշել է, որ իրավիճակն Ուկրաինային ավելի շատ վնաս է պատճառել, քան օգուտ, և որ Թուրքիան երկխոսում է երկու երկրների հետ՝ խաղաղությանը մոտենալու համար։
«Միավորելով կողմերին Անթալիայում և Ստամբուլում՝ մենք նպաստեցինք խնդիրների լուծման համար երկխոսության կարևոր ուղու ստեղծմանը: Սևծովյան հացահատիկի նախաձեռնությունը և հացահատիկի առաքումները, որոնք մենք այնտեղից կատարեցինք, շատ ավելին էին, քան պարզապես տնտեսական և նյութատեխնիկական գործունեություն: Մենք չենք հավատում, որ այս պատերազմը միայն մեկ կողմի հաղթանակով կամ պարտությամբ սահմանափակելը լուծում է։ Մենք կարծում ենք, որ լուծումը երկխոսության և դիվանագիտության մեջ է։ ՆԱՏՕ-ի և Ռուսաստանի միջև ուղղակի հակամարտության հավանականությունը, անկասկած, մտահոգիչ է։ Ցանկացած քայլից, որը կարող է հանգեցնել այս արդյունքին, պետք է գիտակցաբար խուսափել: Կարծում ենք՝ տեղին է հարցին մոտենալ լուծմանը միտված ու չափված մոտեցմամբ»,- ասել է Էրդողանը։
Սիրիայի, Լիբիայի, նույնիսկ Ուկրաինայի հարցով ՌԴ նախագահ Վլադիմիր Պուտինի հետ դիվանագիտության մասին հարցին էլ Էրդողանն այսպես է արձագանքել․ «Ձեր նշած բոլոր շրջաններում մենք սկզբունքային մոտեցում ենք պաշտպանում։ Մենք խնդիրներին մոտենում ենք անկեղծ և իրատեսական ճանապարհային քարտեզներով, այլ ոչ թե թաքնված օրակարգերից և զգացմունքային արձագանքներից բխող սկզբունքներով: Մենք առաջ ենք շարժվում՝ բարձրաձայնելով, թե ինչն է ճիշտ և ինչը՝ սխալ։ Անհնար է խթանել զգայուն գործընթացները՝ առանց դրանց հանգիստ մոտենալու»։
Նա նշել է նաև, որ Թուրքիան ամեն հարցում չէ, որ համաձայն է Պուտինի հետ։
«Բնականաբար, մենք ամեն ինչում համաձայն չէ, որ համաձայն ենք պարոն Պուտինի հետ, բայց մենք կարող ենք հարցերը քննարկել իրար մեջ և մանրամասնել, թե ինչպես լուծել դրանք»,- հայտարարել է Էրդողանը։
