23.02.2026 | 09:33
Երևանի քաղաքապետարանի գործակարգավարական նիստը. ՈՒՂԻՂ
Աստանայում մեկնարկել են Էրդողանի ու Պուտինի բանակցությունները
Քաղաքականություն
03.07.2024 | 17:04
Աստանայում Շանհայի համագործակցության կազմակերպության շրջանակում անցկացվում է ՌԴ նախագահ Վլադիմիր Պուտինի ու Թուրքիայի նախագահ Ռեջեփ Թայիփ Էրդողանի հանդիպումը։ Թուրքական լրատվամիջոցների հաղորդմամբ՝ Էրդողանն իր բացման խոսքում ասել է, թե վաղուց չէր տեսել իր սիրելի ընկերոջը։
«Մենք շփվել ենք հեռախոսային դիվանագիտության միջոցով, բայց մեր ընկերներն անընդհատ շփվում են միմյանց հետ, մեր նախարարներն անընդհատ կապի մեջ էին։ Ատոմակայանների մասով լուրջ քայլեր ենք անելու։ Մենք բանակցում ենք Սինոպի ատոմակայանի հետ կապված։ Հավատում ենք, որ կարող ենք լուրջ քայլեր ձեռնարկել այս ուղղությամբ։ Մեր էներգետիկայի և բնական պաշարների նախարարն այս հարցով շարունակում է իր գործընկերոջ հետ բանակցությունները»,- ասել է Էրդողանը։
Նա նաև նշել է, որ երկու երկրների պետական նավթագազային ընկերությունների՝ BOTAŞ-ի և «Գազպրոմ»-ի համագործակցությունը շարունակվում է։
«Այս 55 միլիարդ դոլարի առևտրաշրջանառության ծավալը մեզ համար այնքան էլ կարևոր չէ։ Մեր նպատակն էր՝ հասնել 100 միլիարդ դոլարի։ Ես հավատում եմ, որ մենք կարող ենք հասնել այս 100 միլիարդ դոլարին, այդպիսի ներուժ ունենք։ Զբոսաշրջության տեսանկյունից մեզ համար շատ կարևոր էր, որ մեր երկիր է եկել շուրջ 7 միլիոն զբոսաշրջիկ։ Կարևոր է Թուրքիայում ռուս զբոսաշրջիկներին ընդունելը»,- ասել է Էրդողանը։
Պուտինն իր հերթին նշել է, որ երկու երկրների հարաբերություններն աստիճանաբար զարգանում են, ինքն ու թուրք պաշտոնակիցը մշտապես կապի մեջ են և կարծիքներ են փոխանակում աշխարհում տիրող իրավիճակի վերաբերյալ։
«Չնայած աշխարհում առկա բոլոր դժվարություններին՝ Ռուսաստանի և Թուրքիայի հարաբերությունները զարգանում են աստիճանաբար։ Նախորդ մի քանի ամիսների ընթացքում մենք նկատել ենք ապրանքաշրջանառության մի փոքր անկում, բայց այն մնում է բավականին բարձր մակարդակի վրա՝ 55 միլիարդ դոլար, եթե այն հաշվենք դոլարին համարժեք»,- ասել է ՌԴ նախագահը։
Պուտինը նաև խոստացել է Էրդողանին այցելել Թուրքիա՝ բանակցություններ անցկացնելու։
«Անպայման կգամ»,- ասել է նա։
