Հասարակություն
03.07.2024 | 16:16
Երևան քաղաքի ընդհանուր իրավասության դատարանի Շենգավիթ նստավայրում քննվող ընտանեկան բռնության գործերից մեկով երեկ հրապարակվեց բռնության ենթարկված կնոջ չափահաս որդու ցուցմունքը։ Տղան նախաքննության փուլում երկու անգամ ցուցմունք է տվել՝ պատմելով, թե ինչպես է ականատես եղել հոր կողմից մոր նկատմամբ բռնության, փորձել պաշտպանել մորը։
Ցուցմունքի համաձայն՝ միջադեպի օրը հայրն ալկոհոլ օգտագործելուց հետո սկսել է վիճել մոր հետ ֆինանսական հարցերի շուրջ, հայհոյելուց բացի անցել է ֆիզիկական բռնության։ Տղան պատմել է, որ հայրը մոր ձեռքից բռնել է, մի կողմ քաշել, շարունակել վիճաբանել, ապա տղան հարվածի ձայն է լսել, շտապել է միջամտել։
«Ես ընկա նրանց մեջտեղը, հորս խնդրեցի, որ չվիճի ու մայրիկիս չխփի, նույնիսկ հիշում եմ, որ ասել եմ՝ «ինձ խփի, ոչ թե մորս»»,- նշել է տղան իր ցուցմունքում, ապա քննիչին գրավոր խնդրել է հորը «օրենքի շրջանակներում կարգի հրավիրել, որպեսզի նման իրավիճակներ չառաջանան»։
Տղան երկրորդ ցուցմունքում պատմել է բռնության մեկ այլ դրվագի մասին, երբ հայրը ոտքով երկու անգամ հարվածել է մոր ոտքերին և ոլորել է ձեռքը։ Որդին դարձյալ միջամտել է՝ կանխելով հետագա բռնությունները։ Տղան այժմ բացակայում է երկրից, այդ պատճառով չի հաջողվել նրան դատարան հրավիրել, այդ պատճառով էլ հրապարակվեց նրա նախաքննական ցուցմունքը։
Դրանից հետո մեղադրյալը հայտարարեց, որ ընդունում է մեղքը։ Ըստ մեղադրանքի՝ նա ֆիզիկական ներգործություն է կիրառել՝ հարվածներ է հասցրել և բռնի այլ գործողություններ է կատարել մերձավոր ազգականի՝ փաստական ամուսնական հարաբերությունների մեջ գտնվող կնոջ նկատմամբ, ինչպես նաև չի կատարել անհետաձգելի միջամտության որոշման պահանջները:
Երեկվա դատական նիստին դատավոր Նելլի Բաղդասարյանն առաջարկեց անցնել տուժողի հարցաքննությանը, սակայն մեղադրող Բադալյանը խնդրեց հետաձգել դատական նիստը, քանի որ այլ դատարանում պետք է ուրիշ նիստի մասնակցեր։ Ի դեպ, հանրային մեղադրողը տվյալ դատական նիստին ներկայացել էր 39 րոպե ուշացումով՝ դատարանին փաստացի հնարավորություն չտալով լսելու տուժողի և մեղադրյալի ցուցմունքները։
Հաջորդ դատական նիստը նշանակվեց հուլիսի 31-ին ժամը 10։00-ին։
Արման Ղարիբյան
Նկարազարումը՝Ելենա Ակոջյանի
