30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ալիևի հետ հանդիպմանը Օ՛Բրայենն ընդգծել է տարածաշրջանային խաղաղության օրակարգն առաջ մղելու՝ ԱՄՆ-ի հանձնառությունը
Քաղաքականություն
28.06.2024 | 14:04
Ադրբեջանի նախագահ Իլհամ Ալիևն այսօր Բաքվում ընդունել է ԱՄՆ պետքարտուղարի Եվրոպայի ու Եվրասիայի հարցերով տեղակալ Ջեյմս Օ՛Բրայենին։ Ադրբեջանական կողմի տարածած հաղորդագրության համաձայն՝ Օ՛Բրայենը գոհունակությամբ է խոսել ԱՄՆ պետքարտուղար Էնթոնի Բլինքենի և Ադրբեջանի նախագահ Իլհամ Ալիևի վերջին հեռախոսազրույցի ու դրա ընթացքում տեղի ունեցած քննարկումների մասին։ Նա ընդգծել է տարածաշրջանային խաղաղության օրակարգն առաջ մղելու՝ ԱՄՆ-ի հանձնառությունը և այս գործընթացին աջակցելու Միացյալ Նահանգների պատրաստակամությունը։
Օ՛Բրայենը նշել է Ադրբեջանի և ԱՄՆ-ի միջև համագործակցության կարևորությունը տարբեր ոլորտներում, այդ թվում՝ ռազմավարական մակարդակով հարաբերությունների հետագա զարգացումը։ Այդ համատեքստում քննարկվել են տարածաշրջանային համագործակցության հետ կապված հարցեր, Միջին միջանցքը և այլն։
Ալիևը ևս գոհունակությամբ է հիշել Բլինքենի հետ օրերս ունեցած հեռախոսազրույցը՝ նշելով, որ քննարկվել է հարցերի լայն շրջանակ։
Հանդիպման ընթացքում նշվել է Ադրբեջանի դերը Եվրոպայի էներգետիկ անվտանգության մեջ, էներգետիկ ոլորտում Ադրբեջանի և ԱՄՆ-ի համագործակցությունը, արդյունավետ և օգտակար խորհրդակցությունները երկու երկրների պատվիրակությունների միջև COP29-ի շրջանակում։ Ընդգծվել է, որ ԱՄՆ-ը կշարունակի աջակցել COP29-ի հաջող անցկացմանը։
Նշենք, որ Բաքու այցից առաջ Օ՛Բրայենը, ելույթ ունենալով Կոնգրեսի Ներկայացուցիչների պալատի արտաքին հարաբերությունների հանձնաժողովի լսումների ժամանակ, անդրադաձել էր Ադրբեջան կատարելիք այցին՝ նշելով, որ Ալիևին մի շարք ուղերձներ է փոխանցելու։
«Նախագահ Ալիևի հետ մենք հետ շատ հստակ ենք՝ եկել է խաղաղություն հաստատելու ժամանակը։ Սա միայն Ադրբեջանի հարցը չէ, այլ ամբողջ տարածաշրջանի ու Կենտրոնական Ասիայի։ Այս բոլոր երկրներն արտահանում են միայն Չինաստանով կամ Ռուսաստանով։ Որպեսզի նրանք ունենան ելք, պետք է աշխատեն Ադրբեջանով։ Մի երթուղի անցնում է Վրաստանով՝ Սև ծով, սակայն մյուսը՝ պոտենցիալ ավելի մեծը, կարող է անցնել Ադրբեջանով, Հայաստանով և Թուրքիայով, այդ պատճառով մեզ անհրաժեշտ է խաղաղության պայմանագիր Ադրբեջանի և Հայաստանի միջև՝ վերջ տալու պատերազմին ու սարսափելի հակամարտությանը, որը գոյություն ունի 90-ականներից։ Մեր ուղերձը նրանումն է, որ եկել է խաղաղություն հաստատելու ժամանակը»,- ասել էր Պետքարտուղարության պաշտոնյան։
Նա նաև նշել էր, որ Իլհամ Ալիևի հետ խոսելու է մարդու իրավունքները հարգելու կարևորության մասին։
«Դա զրույցի շարունակական թեմա է, նաև պետքարտուղար Բլինքենն է նրա հետ վերջին օրերին խոսել, և ես անհամբեր սպասում եմ, որ այդ խոսակցությունը նույնպես կշարունակվի»,- հայտարարել էր Օ՛Բրայենը։
Էմմա Չոբանյան
