18.12.2025 | 23:09
Գիտությունն ավելի հաճախ պետք է կապվի արդյունաբերության հետ, որպեսզի արդյունավետությունը հնարավոր լինի չափել. Հակոբ Արշակյան
Դատարանն ազատ է արձակել Ջուլիան Ասանժին․ նա մեկնել է Ավստրալիա
Քաղաքականություն
26.06.2024 | 10:54
WikiLeaks-ի հիմնադիր Ջուլիան Ասանժը Հյուսիսային Մարիանյան կղզիների դաշնային շրջանային դատարանում (ԱՄՆ տարածք Խաղաղ օվկիանոսի արևելյան մասում) ԱՄՆ իշխանությունների հետ գործարքի շրջանակում իրեն մեղավոր է ճանաչել դավադրության մեջ՝ ազգային պաշտպանության մասին տեղեկություններ ստանալու և հրապարակելու համար: Դատավոր Ռամոնա Մանգլոնան նրան ազատ արձակելու որոշում է կայացրել՝ բրիտանական բանտում արդեն իսկ անցկացրած ժամանակի պատճառով։ Այս մասին հաղորդում է Reuters-ը, որին վկայակոչում է Current time-ը։
«Ես համարում էի, որ Առաջին ուղղումը (ԱՄՆ Սահմանադրության առաջին փոփոխությունը խոսքի ազատության մասին, ըստ որի՝ «Կոնգրեսը չպետք է ընդունի խոսքի կամ մամուլի ազատությունը սահմանափակող օրենք») պաշտպանում է այս գործունեությունը, բայց ես ընդունում եմ, որ դա լրտեսության մասին օրենքի խախտում էր»,- դատարանում ասել է 52-ամյա Ասանժը:
Երեք ժամ տևած լսումներից հետո Ջուլիան Ասանժը լքել է դատարանի շենքը՝ չպատասխանելով լրագրողների հարցերին։ Այնուհետև նա մասնավոր ինքնաթիռով մեկնել է Ավստրալիա:
Բոլոր մյուս և ավելի ծանր մեղադրանքները, որոնք կարող էին հանգեցնել երկարատև ազատազրկման, հանվել են։ ԱՄՆ իշխանությունները նաև հետ են կանչել նրա արտահանձնման մասին դիմումը։
Ասանժը 1901 օր անցկացրել է Լոնդոնի «Բելմարշ» խիստ ռեժիմի բանտում։ ԱՄՆ-ում նրան, ի թիվս այլ բաների, մեղադրում էին Իրաքում և Աֆղանստանում ռազմական գործողությունների մասին գաղտնի տեղեկություններ հրապարակելու մեջ։ Հիմնական անձը, որը կազմակերպել էր արտահոսքը, զինծառայող Բրեդլի (Չելսի) Մենինգն է, իսկ WikiLeaks-ը հրապարակել է միայն փաստաթղթերը։
