26.06.2026 | 18:00
ԴՕԿ-ը Դանիել Իոաննիսյանին վկայի կարգավիճակով ՍԴ հրավիրելու միջնորդություն ներկայացրեց․ ՏԵՍԱՆՅՈՒԹ
Դաղստանում զինյալների հարձակման հետևանքով ավելի քան 15 ոստիկան է զոհվել․հակաահաբեկչական գործողության ռեժիմը հանվել է
Քաղաքականություն
24.06.2024 | 10:48
Դաղստանի ղեկավար Սերգեյ Մելիքովը հայտնել է, որ հունիսի 23-ին զինյալների հարձակման հետևանքով սպանվել են ոստիկաններ և մի քանի խաղաղ բնակիչ, իսկ հակաահաբեկչական գործողության ժամանակ սպանվել է հարձակվողներից 6-ը, գրում է Meduza-ն։
«Այսօրվա ահաբեկչության զոհ է դարձել ավելի քան 15 ոստիկան՝ զենքերը ձեռքներին պաշտպանելով Դաղստանի խաղաղությունն ու անդորրը»,-ասել է նա իր տելեգրամ ալիքում հրապարակված տեսաուղերձում։
Նրա խոսքով՝ բախումների ընթացքում մահացել է քաղաքացիական մի քանի անձ, որոնց կոնկրետ թիվը չի նշել։ Մահացած խաղաղ բնակիչների թվում, Մելիքովը նշել է Նիկոլայ քահանային, որը ավելի քան 40 տարի ծառայել է Դերբենտի ուղղափառ եկեղեցում։ Դաղստանի ղեկավարը հավելել է, որ զոհվածների ու վիրավորների ընտանիքները կստանան դրամական օգնություն։
Նա հայտարարել է, որ իրավիճակը «վերահսկվում է պետական իշխանությունների և իրավապահ մարմինների կողմից»։ Մախաչկալայում և Դերբենտում օպերատիվ մարտական գործողությունների ակտիվ փուլն ավարտվել է։ Նրա խոսքով՝ իրավապահ և քննչական մարմինները կշարունակեն աշխատել «մինչև բացահայտեն բոլոր մասնակիցներին, որոնք, իհարկե, պատրաստվել են, այդ թվում՝ արտերկրից»։
Մելիքովը ասել է, թե իշխանությունները հասկանում են, թե ովքեր են կանգնած ահաբեկչությունների կազմակերպման հետևում և ինչ նպատակներ են հետապնդել։ Դաղստանում հունիսի 24-ը, 25-ը և 26-ը սգո օրեր են հայտարարվել։
Ազգային հակաահաբեկչական կոմիտեն էլ հայտնում է, որ Դաղստանում զինյալների հարձակումից հետո իրականացվող հակաահաբեկչական գործողությունը ավարտվել է։
«Քաղաքացիների կյանքին և առողջությանը սպառնացող վտանգների վերացման կապակցությամբ «Ահաբեկչության դեմ պայքարի մասին» դաշնային օրենքին համապատասխան, որոշում է կայացվել դադարեցնել հակաահաբեկչական գործողությունը»,-ասվում է հայտարարության մեջ։
