07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Դեպի Վերին Լարս տանող նոր ճանապարհը կարող է պատրաստ լինել 2025թ․ վերջին
Քաղաքականություն
19.06.2024 | 18:18
Երևան-Թբիլիսի-Վլադիկավկազ ռազմավարական մայրուղու Քվեշեթի-Կոբի ճանապարհի նոր՝ 23 կիլոմետրանոց հատվածի շինարարությունն «ակտիվորեն շարունակվում է և կավարտվի մինչև հաջորդ տարվա վերջ»։ Այս մասին այսօր հայտնել է Վրաստանի Տարածաշրջանային զարգացման եւ ենթակառուցվածքների նախարարության ավտոմոբիլային տրանսպորտի վարչությունը, փոխանցում է commersant.ge-ն։
Գերատեսչության տվյալներով՝ պատմական «Վրացական ռազմական ճանապարհի» այս նոր հատվածը կլուծի ձնահոսքի և սելավների պատճառով Հայաստանից և Վրաստանից դեպի Ռուսաստանի Դաշնություն ճանապարհային երթեւեկության հաճախակի դադարեցման խնդիրը։
Աշուն-ձմեռ և գարուն-ամառ ժամանակահատվածում հարյուրավոր, երբեմն էլ՝ հազարավոր բեռնատար մեքենաներ հաճախ օրերով կանգնում են մայրուղու վրա՝ սպասելով երթևեկությունը վերսկսելու՝ Վրաստանի ճանապարհային ոստիկանության թույլտվությանը:
Քվեշեթի-Կոբի ճանապարհը թույլ կտա հարավկովկասյան երկրներից շարժվել դեպի Ռուսաստան և հակառակ ուղղությամբ՝ շրջանցելով բարձր լեռնանցքները։ Այդ նպատակով ճանապարհին հինգ թունել է կառուցվում։ Դրանց թվում է իր տեսակի մեջ եզակի՝ ինը կիլոմետրանոց թունելը: Բացի այդ, կառուցվում են հինգ կամուրջներ։
Ճանապարհային տրանսպորտի վարչության հաղորդագրության համաձայն՝ ճանապարհի Քվեշեթի-Կոբի հատվածի ակտիվացումից հետո ռազմավարական նշանակության մայրուղին «այլևս չի փակվի ձմռանը», իսկ Թբիլիսիից Ռուսաստանի Դաշնության հետ սահման տանող ճանապարհը 2,5 ժամի փոխարեն կտևի ընդամենը 1 ժամ 45 րոպե։
