11.08.2026 | 13:00
Թուրքիայի խորհրդարանը հաստատել է քրդական PKK-ի զինյալների համար համաներում հայտարարելու օրենքը
Թաիլանդը ՌԴ-ին տեղեկացրել է BRICS-ին անդամակցելու մտադրության մասին
Քաղաքականություն
14.06.2024 | 14:49
Թաիլանդի արտաքին գործերի նախարար Մարիտ Սանգյամֆոնգը Ռուսաստանի արտգործնախարար Սերգեյ Լավրովին նամակ է հանձնել BRICS-ի անդամ դառնալու՝ թագավորության մտադրության մասին։ Այս մասին հայտարարել է Թաիլանդի նախարարությունը՝ հունիսի 11-ին Նիժնի Նովգորոդում կայացած «BRICS-ի երկխոսությունը զարգացող երկրների հետ» համաժողովի արդյունքներով, գրում է Կոմերսանտը։
Թաիլանդի ԱԳՆ-ն նշել է, որ այս միջոցառումը BRICS-ի հինգերորդ բարձր մակարդակի հանդիպումն էր, որին մասնակցել են թագավորության ներկայացուցիչները։ Սանգյամֆոնգն ասել է, որ Թաիլանդը, հանդես գալով որպես միջնորդ երկրների տարբեր խմբերի միջև, «կարող է մեծացնել BRICS-ի ներառականությունն ու փոխկապակցվածությունը», ինչպես նաև բարձրացնել BRICS-ի արդյունավետությունը զարգացող երկրների շահերը խթանելու գործում:
Նա մի շարք առաջարկներ է արել BRICS-ի և նման երկրների միջև էներգետիկայի ու պարենային անվտանգության և տեղական արժույթների օգտագործման ոլորտներում համագործակցության ընդլայնման վերաբերյալ։
«BRICS -ի անդամ յուրաքանչյուր երկիր ողջունել է Թաիլանդի որոշումը և կարծում էր, որ Թաիլանդը կարող է նպաստել BRICS-ի հաջողությանը: Նախարարը նաև նամակ է ներկայացրել Ռուսաստանի արտաքին գործերի նախարար Սերգեյ Լավրովին BRICS-ի լիիրավ անդամ դառնալու՝ Թաիլանդի մտադրության մասին»,- ասվում է թագավորության ԱԳՆ մամուլի հաղորդագրության մեջ։
Նիժնի Նովգորոդում տեղի է ունեցել BRICS-ի անդամ երկրների ԱԳ նախարարությունների ղեկավարների հանդիպումն ընդլայնված կազմով՝ Ռուսաստանին բարեկամ մի խումբ պետությունների մասնակցությամբ, որոնք այս ասոցիացիայի անդամ չեն։
