01.11.2024 | 18:38
Իսպանիայում ջրհեղեղի զոհերի թիվը հասել է 208-ի. կան անհայտ թվով կորածներ
Ռուսական բանակը հրթիռներով և ԱԹՍ-ներով հարվածել է Կիևին․ Ուկրաինայում լայնածավալ օդային հարձակումների նախազգուշացում է հայտարարվել
Քաղաքականություն
12.06.2024 | 10:51
Հունիսի 11-ի լույս 12-ի գիշերը ռուսական բանակը հրթիռներով և անօդաչու սարքերով հարձակվել է Կիևի վրա։ Նախնական տվյալներով՝ զոհեր և ավերածություններ չկան, փոխանցում է Current Time-ը։
Ամբողջ Ուկրաինայում հայտարարվել է լայնածավալ օդային հարձակման նախազգուշացում, որը տևել է մոտ երկու ժամ՝ համաձայն համապատասխան ահազանգերի մոնիթորինգի ծառայությունների:
Կիևի տարածաշրջանային ռազմական վարչակազմի տվյալներով՝ ռուս զինվորականները X-101/X-555/X-55 թևավոր հրթիռներ են արձակել Ուկրաինայի մայրաքաղաքի ուղղությամբ։
«Այդ հրթիռները մի քանի ալիքներով մոտեցել են Կիևին հարավային ուղղությամբ, նույն հարավային ուղղությամբ հակառակորդի հարձակողական անօդաչու թռչող սարքերը շարժվում էին դեպի մայրաքաղաք։ Հակառակորդը, նախնական տվյալներով, նաև բալիստիկ հրթիռ է արձակել մայրաքաղաքի ուղղությամբ»,- հայտնում է Կիևի քաղաքային ռազմական վարչակազմը։
Ուկրաինացի զինվորականները հայտնել են օդային բոլոր թիրախների ոչնչացման մասին։ Ավելի ուշ ռազմաօդային ուժերը պարզաբանել են, որ իրենց հաջողվել է խոցել մեկ «Կինժալ», չորս X-101/X-555 թեւավոր հրթիռ և 24 «Շահեդ»:
Նախնական տեղեկություններով՝ հարվածի հետևանքով զոհեր և ավերածություններ չկան։
Կիևի քաղաքային ռազմական վարչակազմի ղեկավար Սերգեյ Պոպկոյի խոսքով՝ Ուկրաինայի մայրաքաղաքին հասցված հարվածը ցույց է տվել, որ «ագրեսորը չի հրաժարվել Կիևի հրթիռային տեռորից», և հարվածների արդյունավետության համար թշնամին «կփնտրի նոր և նոր կոմբինացիաներ՝ ճեղքելու հակաօդային պաշտպանությունը»։
Ռուսական կողմը դեռևս չի մեկնաբանել Ուկրաինայի մայրաքաղաքին հարվածները։
