11.08.2026 | 11:42
Էմին Օհանյանը՝ շախմատի Եվրոպայի Մ-20 առաջնության միանձնյա առաջատար
Պեսկովը նշել է, թե ինչու Պուտինի այցը Թուրքիա տեղի չի ունենում
Քաղաքականություն
07.06.2024 | 15:51
Ռուս-թուրքական շփումները շարունակվում են բոլոր մակարդակներով, սակայն Ռուսաստանի նախագահ Վլադիմիր Պուտինի այցը Թուրքիա հետաձգվել է՝ թուրք գործընկեր Ռեջեփ Թայիփ Էրդողանի հետ գրաֆիկների անհամապատասխանության պատճառով։ Այն կարծիքը, թե այցի հետաձգումը կապված է երկու երկրների հարաբերություններում առկա խնդիրների հետ, թյուր է։ Այս մասին ճեպազրույցում հայտարարել է ՌԴ նախագահի մամուլի խոսնակ Դմիտրի Պեսկովը։
«Դա սխալ տպավորություն է։ Չստացվեց նախագահների գրաֆիկները համատեղել, բայց բարձր մակարդակի շփումները կշարունակվեն շատ մոտ ապագայում։ Նման շփումների նախապատրաստումը մշտապես է տարվում»,- ասել է Պեսկովը։
Նշենք, որ դեռևս ապրիլի կեսերին Թուրքիայի նախագահ Ռեջեփ Թայիփ Էրդողանը կառավարության նիստից հետո լրագրողների հետ զրույցում անդրադարձել էր հարցին՝ արդյո՞ք որոշված է ՌԴ նախագահ Վլադիմիր Պուտինի՝ Թուրքիա այցի ժամկետը։
«Մենք հաճախակի ենք հեռախոսազրույցներ ունենում պարոն Պուտինի հետ: Թուրքիա նրա այցի ժամկետը դեռևս որոշված չէ: Կարծում եմ՝ այդ հարցը հնարավորինս շուտ կհստակեցվի»,- պատասխանել էր Էրդողանը։
Հավելենք, որ ռուսական և թուրքական դիվանագիտական աղբյուրներն ու միջազգային լրատվամիջոցներն ավելի վաղ հայտարարել էին, որ Պուտինի այցը Թուրքիա տեղի է ունենալու փետրվարի 12-ին։ Այն, որ այցը լինելու է փետրվարին, հայտնել էր նաև ՌԴ նախագահի արտաքին հարաբերությունների հարցերով օգնական Յուրի Ուշակովը։ Սակայն այցն այդպես էլ տեղի չունեցավ։ Այնուհետև տեղեկություններ տարածվեցին, որ այցը տեղի կունենա մարտի 31-ին Թուրքիայում ՏԻՄ ընտրություններից հետո։
Էմմա Չոբանյան
