07.10.2026 | 15:44
ԱՄՆ-ում մահապատժի ընթացքում ողջ մնացած կինը գիտակցության է եկել
ԱՄՆ Պետդեպը կոչ է անում Ադրբեջանի իշխանություններին անհապաղ ազատ արձակել անարդարացի ձերբակալվածներին
Քաղաքականություն
06.06.2024 | 15:22
ԱՄՆ Պետքարտուղարությունը կրկին կոչով դիմել է Ադրբեջանի իշխանություններին՝ անհապաղ ազատ արձակելու բոլոր անարդարացի ձերբակալվածներին։ Այս մասին ճեպազրույցում հայտարարել է Պետքարտուղարության խոսնակ Մեթյու Միլլերը՝ անդրադառնալով դիտարկմանը, որ Ադրբեջանում կալանավորվել է ևս մեկ հայտնի տնտեսագետ ու լրագրող՝ Ֆարիդ Մեհրալիզադեն։
«Մենք խորապես անհանգստացած ենք Ադրբեջանի քաղաքացիական հասարակության անդամների շարունակական կալանավորումների կապակցությամբ։ Նրանք, որոնք օգտագործում են իրենց հիմնարար ազատությունները, ներառյալ՝ խոսքի ազատությունը, չպետք է կալանավորվեն դրա համար։ Մենք շարունակում ենք կոչ անել Ադրբեջանի կառավարությանը՝ անհապաղ ազատ արձակել բոլոր անձանց, ովքեր անարդարացի ձերբակալվել են և հարգել բոլորի մարդու իրավունքներն ու հիմնարար ազատությունները»,- ասել է Միլլերը։
Նշենք, որ Ֆարիդ Մեհրալիզադեն ձերբակալվել էր մայիսի 30-ին AbzasMedia-ի գործով կառավարության կողմից շարունակվող բռնաճնշումների շրջանակում մաքսանենգության մեղադրանքով։ Այնուհետև հունիսի 1-ին Խաթայի շրջանային դատարանը տնտեսագետին 3 ամիս 20 օր ժամկետով կալանավորելու որոշում էր կայացրել։ Մեհրալիզադեն և AbzasMedia-ն հերքում են որևէ կապ։
Օրերս էլ ԵՄ արտաքին կապերի և անվտանգության ծառայության խոսնակ Պետեր Ստանոն հայտարարություն էր տարածել Ադրբեջանում ներման ակտի ու մարդու իրավունքների իրավիճակի վերաբերյալ։ ԵՄ-ն Բաքվին կոչ էր արել դադարեցնել ճնշումներն ու ազատ արձակել քաղբանտարկյալներին։
Վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ, ընդդիմադիր գործիչներ ու քաղաքական ակտիվիստներ։
