11.08.2026 | 19:18
Ռուսական «ստվերային նավատորմի» լցանավի վրացի հրամանատարն ԱՄՆ-ում դատապարտվել է 10 ամսվա ազատազրկման
Ադրբեջանում ընդդիմադիր գործչին կալանավորել են համացանցում ոստիկանների բռնությունների տեսանյութ տարածելու համար
Քաղաքականություն
30.05.2024 | 23:17
Ադրբեջանի Շիրվան քաղաքում կալանավորվել է ընդդիմադիր ժողովրդական ճակատ կուսակցության ակտիվիստ Մեհման Ալիևը սոցիալական ցանցերում ոստիկանության ապօրինի գործողությունների մասին տեսանյութ տարածելու համար։ Այս մասին տեղական լրատվամիջոցներին հայտնել են նրա հարազատները։
Ակտիվստի հայրը՝ Այդին Ալիևը, պատմել է, որ իր որդին օրերս համացանցում տարածել է տեսանյութ իր եղբոր՝ Ալի Իսաևին բռնի ուժով ձերբակալելու մասին։
«Սա տեղի է ունեցել մեկ շաբաթ առաջ։ Մեհմանը, աղմուկ լսելով, դուրս եկավ փողոց, երբ քաղաքացիական հանգուստով մարդիկ փորձում էին ձերբակալել Ալիին, իսկ նա բղավում էր, որ իրեն ցանկանում են մեղադրել թմրանյութերի տարածման մեջ։ Մեհմանը սկսեց նկարահանել և առաջարկեց Ալիին խուզարկել»,-ասել է Այդին Ալիևը։
Ավելի ուշ ոստիկանությունը պահանջել է ջնջել տեսանյութը, սակայն Մեհմանը հրաժարվել է։ Արդյունքում և՛ Իսաևը, և՛ Ալիևը կալանավորվել են թմրամիջոցների ապօրինի շրջանառության մեղադրանքով։ Նրանց հարազատները ձերբակալության մասին իմացել են պաշտոնական հաղորդագրություններից։
«Մեհմանը զանգահարել է և հայտնել, որ ինքը գտնվում է Քյուրդախանի քննչական մեկուսարանում և դաժան ծեծի է ենթարկվել ոստիկանների կողմից։ Նա մեղադրվում է հերոինի վաճառքի մեջ։ Սա ճիշտ չէ, նա իր օրվա հացը վաստակել է ամենօրյա աշխատանքով»,- ասել է Այդին Ալիևը։
Ժողովրդական ճակատից հաստատել են, որ Մեհման Ալիևը կուսակցության անդամ է և նրա կալանավորումը կապել են տեսանյութի տարածման հետ։
Հավելենք, որ նախօրեին էլ ԵՄ արտաքին կապերի և անվտանգության ծառայության մամուլի քարտուղար Պետեր Ստանոն հայտարարություն էր տարածել Ադրբեջանում ներման ակտի ու մարդու իրավունքների իրավիճակի վերաբերյալ։ ԵՄ-ն Բաքվին կոչ էր արել դադարեցնել ճնշումներն ու ազատ արձակել քաղբանտարկյալներին։
Էմմա Չոբանյան
