Նոր Կալեդոնիայից հետո Բաքուն այժմ էլ անհանգստացած է Ֆրանսիական Պոլինեզիայով

Ֆրանսիական Նոր Կալեդոնիայից հետո Բաքուն հիմա էլ սկսել է հետաքրքրություն ցուցաբերել Պոլինեզիայի նկատմամբ։  Ադրբեջանական լրատվամիջոցները հայտնում են, որ Ադրբեջան են ժամանել Խաղաղ օվկիանոսում գտնվող Ֆրանսիական Պոլինեզիայի խորհրդարանի հանձնաժողովների ղեկավարները և քարտուղարները, ինչպես նաև իշխող «Տավինի» կուսակցության ղեկավարությունը։

Քառօրյա այցի նպատակն է դիտարկել Ադրբեջանի և Ֆրանսիական Պոլինեզիայի միջև համագործակցության հնարավորությունները միջխորհրդարանական, տնտեսական, հումանիտար, ինչպես նաև գիտության, կրթության, սպորտի, առողջապահության և այլ ոլորտներում։

Օրերսլ մեջլիսում  անցկացվել է  հերթական հակաֆրանսիական համաժողովը՝ «Ֆրանսիական Պոլինեզիայի ապագաղութացման իրավունքը. մարտահրավերներ և հեռանկարներ» թեմայով։ Միջոցառման ժամանակ  «Տավինի» կուսակցության  գլխավոր քարտուղար Վիկտոր Մաամաատուայհուտապուն ասել է, որ «Ֆրանսիական Պոլինեզիան ապագաղութացման գործընթացում Ադրբեջանի աջակցության կարիքն ունի»։

«Մենք քաղաքականապես երիտասարդ ազգ  ենք, և մեզ անհրաժեշտ է Ադրբեջանի աջակցությունը, մենք հավատում ենք, որ դուք մեզ կօգնեք, և արդարությունը կհաղթի», – ասել է նա։

Ֆրանսիական Պոլինեզիայի ասամբլեայի կրթության, երիտասարդության և սպորտի հանձնաժողովի փոխնախագահ Հուորե Տևոպեն ևս  Բաքվի օգնությունն է խնդրել։

«Մենք ակնկալում ենք աջակցություն Ադրբեջանից և միջազգային հանրությունից. Ինքնիշխանության ձեռքբերումը մեզ թույլ կտա պահպանել մեր յուրահատուկ ժառանգությունը և պաշտպանել ժողովրդի շահերը»,-ասել է նա։ Այլ ներկայացուցիչներ Ֆրանսիական Պոլինեզիայից ևս ելույթներ են ունեցել, նրանց են միացել նաև Ադրբեջանի Մեջլիսի պատգամավորները։

«Մենք հավատում ենք, որ այս շարժումը հաջողություն կունենա և վերջապես կպարգևի ճնշված ժողովուրդներին իրենց արժանի ազատությունը։ 44-օրյա պատերազմը հաղթանակով ավարտելով՝ մենք դարձանք փայլուն օրինակ ամբողջ աշխարհի ճնշված ժողովուրդների համար։ Ադրբեջանի փայլուն հաղթանակը կարևոր դեր է խաղում Պոլինեզիայի անկախության շարժման վերածննդի գործում։ Նեոգաղութատիրությունը դատապարտված է»,-ասել է պատգամավոր Զահիդ Օրուջը։

Ֆրանսիական Պոլինեզիայի պատվիրակության այցը տեղի է ունենում Բաքվի նախաձեռնող խմբի հրավերով։

Նշենք, որ Բաքուն Փարիզի դեմ պետական քաղաքականության շրջանակներում սերտ կապեր է հաստատել նաև ֆրանսիական Նոր Կալեդոնիայի հետ։ Ֆրանսիայի ներքին գործերի նախարարն էլ Բաքվին էր մեղադրել վերջերս Նոր Կալեդոնիայում տեղի ունեցած անկարգություններին մասնակցության մեջ։

«Դա ֆանտազիա չէ, դա իրականություն է։ Ես ցավում եմ, որ Կալեդոնիայի անկախության որոշ առաջնորդներ գործարքի են գնացել Ադրբեջանի հետ, դա անվիճելի է»,- ասել էր նախարար Ժերալդ Դարմանենը։

Հակաֆրանսիական արշավի շրջանակում 2023 թվականի հուլիսի 6-ին ստեղծվել է Բաքվի նախաձեռնող խումբը, որը Փարիզի դեմ տարբեր միջոցառումներ է անցկացնում։ Բաքուն սկսել է ակտիվորեն ֆինանսավորել Ֆրանսիայի և Կորսիկայի անդրծովյան տարածքների որոշ ներկայացուցիչների։ Ապրիլին էլ Ադրբեջանի Միլլի Մեջլիսի և Խաղաղ օվկիանոսում գտնվող ֆրանսիական Նոր Կալեդոնիայի Կոնգրեսի միջև ստորագրվել էր համագործակցության հուշագիր։

Էմմա Չոբանյան