13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
Վրաստանի խորհրդարանը հաղթահարել է «օտարերկրյա գործակալների մասին» օրենքի վրա նախագահի վետոն
Քաղաքականություն
28.05.2024 | 19:52
Վրաստանի խորհրդարանը լիագումար նիստում ձայների մեծամասնությամբ հաղթահարեց նախագահ Սալոմե Զուրաբիշվիլիի վետոն «օտարերկրյա գործակալների» մասին օրենքի վրա։ «84 պատգամավոր կողմ են, 4-ը՝ դեմ, օրենքն ընդունվել է», – ասել է խորհրդարանի նախագահ Շալվա Պապուաշվիլին։
Անկախ Վրաստանի պատմության մեջ ամենաամոթալի քայլ համարվող քվեարկությանը նախորդել է մի քանի ժամ քննարկում լիագումար նիստերի դահլիճում և բողոքի ակցիա խորհրդարանի շենքի դիմաց, գրում է«Գրուզիա օնլայնը»։ Չնայած երկրի ներսում աճող դիմադրությանը, ԱՄՆ-ի կողմից պատժամիջոցների հայտարարմանը և Բրյուսելի նախազգուշացմանը, որ օրենքի ընդունումը կբարդացնի Վրաստանի եվրաինտեգրումը, իշխող կուսակցությունն, այնուամենայնիվ, չհրաժարվեց վետոն չեղարկելուց։
Մայիսի 14-ին Վրաստանի խորհրդարանը երրորդ ընթերցմամբ հաստատել էր օտարերկրյա գործակալների մասին օրենքը։ Օրենսդիր մարմնի նախագահ Շալվա Պապուաշվիլին հայտնել էր, որ օրենքին կողմ է քվեարկել 84 պատգամավոր, դեմ՝ 30։
Մի քանի օր անց Զուրաբիշվիլին վետո դրեց օտարերկրյա գործակալների մասին օրենքի վրա։ Նա նշել էր, որ այս օրենքն «իր էությամբ և ոգով ռուսական է», հակասում է Վրաստանի Սահմանադրությանը և եվրոպական բոլոր չափանիշներին և, հետևաբար, խոչընդոտ է հանդիսանում երկրի եվրոպական ճանապարհին։
Դրանից հետո Վրաստանի խորհրդարանի իրավական հարցերի հանձնաժողովը հավանություն էր տվել նախագահի վետոն վերացնելուն։
