Եկեղեցին չպիտի՛ միջամտի քաղաքական գործերին․ սարսափելի է քաղաքականության կրոնականացումը․ Աղասի Թադևոսյան․ ՏԵՍԱՆՅՈՒԹ

Հայ առաքելական եկեղեցին պահպանողական կառույց է, հոգևորականների մեծ մասը կրում և տարածում են ազգայնական գաղափարներ։ Այդ են վկայում մի շարք արտահայտություններ, որ արվում են նրանց կողմից այս օրերին հանրային բանավեճերում և ելույթներում, օրինակ՝ Արցախը վերադարձնելու ծրագրերից են խոսում, չթաքցնելով, որ դա ռևանշ է ենթադրում։ Մշակութային մարդաբան Աղասի Թադևոսյանը Factor TV-ի հետ զրույցում ասում է, որ անընդունելի է Հայ առաքելական եկեղեցու մասնակցությունը քաղաքական գործընթացներին․

«Սարսափելի է, երբ հոգևորականն ասում է, որ ինքը ռևանշիստ է։ Եթե ինքը զուտ անձնական մակարդակում է դա մտածում, դա իր անհատական խնդիրն է։ Բայց եթե ինքը փորձում է դա բերել-մտցնել պետության քաղաքականության մեջ, դա ավանտյուրա է։ Ավանտյուրան մի քաղաքական ծրագիր է, որն ի սկզբանե դատապարտված է անհաջողության, որովհետև այդ նպատակին հասնելու գործիքներ դու չունես»։ Ըստ Աղասի Թադևոսյանի՝ ռևանշիստ լինելու մասին բարձրաձայն հայտարարելուց առաջ դրա հեղինակները պետք է հետազոտած լինեին Ադրբեջանի և Հայաստանի ռազմական կարողությունները, և ունենային հստակ գնահատական, որ պատերազմի պարագայում հաղթանակ է լինելու։

«Իրոք մտածում եք՝ ՀՀ-ն Ադրբեջանի դեմ ռևանշ կարո՞ղ է անել, դա արկածախնդրություն է, սարսափելի վտանգավոր է։ Ռևանշի կոչ արեցիք, իսկ Ադրբեջանի զենքի ցանկը հաշվե՞լ եք, պատերազմում ՀՀ-ն կհաղթի՞, ռևանշիստներից ոչ մեկ չի հաշվել դա»,- նշեց մշակութային մարդաբանը։ Նա խոսեց նաև ՀՀ վարչապետի կողմից իրական և պատմական Հայաստանի մասին դիսկուրսի, հոգևորականների՝ քաղաքականությունում ներգրավվելու, պատերազմի և խաղաղության գաղափարների՝ հասարակության շրջանում ունեցած ընկալումների մասին։

Հարցազրույցն ամբողջությամբ՝ տեսանյութում։

Ռոբերտ Անանյան